EFF-optog straffeloos onder leiding van die polisie

Die EFF-optog in Phoenix (5 Augustus 2021) (Foto: @EFFSouthAfrica/Twitter)

Terwyl die huidige afsonderingsregulasies bepaal dat slegs 100 mense in die buitelug mag vergader, het sowat 1 500 mense Donderdag deelgeneem aan ʼn EFF-optog vanaf Gandhipark na die polisiekantoor in Phoenix in KwaZulu-Natal terwyl die polisie hulle boonop begelei het.

Maroela Media het vroeër berig die EFF in die eThekwini-streek het Donderdag opgeruk na Phoenix, met sy oorwegend Indiërbevolking, in protes teen wat die party bestempel as die “rassemoorde op swart mense”.

Minstens 36 mense is dood in ʼn vlaag moorde wat gepleeg is tydens verlede maand se oproer en plundering in die gebied. Die minister van polisie, Bheki Cele, het Dinsdag gesê die voorvalle van geweld in Phoenix was die episentrum van “grusame misdaad en rassistiese voorvalle wat gelei het tot wrede moorde en beserings, gruwelike skade aan eiendom en ongekende pyn en trauma”. Inwoners het in reaksie op die grootskaalse plundering oënskynlik self probeer om hul gemeenskappe te beskerm, padblokkades opgestel en buurte gepatrolleer. Die situasie het egter in chaos ontaard en die padblokkades het volgens die minister verander in plekke van boendoegeregtigheid waar mense op grond van hul velkleur gekeer is om die buurt binne te gaan.

“Ons vra vir die onmiddellike inhegtenisneming van al daardie rassistiese moordenaars en die beslaglegging van alle onwettige vuurwapens,” lui die EFF se oproep.

Pieter Groenewald, leier van die VF Plus, het intussen gesê dit is onaanvaarbaar dat die polisie nie ’n vinger verroer terwyl inperkingsmaatreëls onder leiding van die polisie verontagsaam word nie. “Dit is hierdie soort optrede waar mense sien dat hulle straffeloos kan wegkom met die oortreding van regulasies wat wetteloosheid aanstig.”

Die VF Plus sal hierdie saak opvolg in die parlement en die polisieminister sal moet verduidelik waarom mense in sommige gevalle nie in hegtenis geneem word nie terwyl daar in ander gevalle wel opgetree word.

“Die polisie se uitsprake dat wet en orde behoorlik toegepas sal word, veral ná die grootskaalse geweldpleging etlike weke gelede, is duidelik net lippetaal. Vandag se gebeure maak dit duidelik dat die polisie magteloos is en eerder met die massas saamwerk om die wet te oortree,” het Groenewald bygevoeg.

Andrew Whitfield, die DA se skaduminister van polisie, het gesê die Demokratiese Alliansie doen ook ʼn beroep op die polisie om op te tree teen die EFF ná hulle verskeie afsonderingsregulasies oortree het.

“Foto’s en video’s van die EFF se optog van eThekwini na Phoenix wys duidelik hoe betogers sonder maskers rondloop en in ʼn skare bymekaarkom sonder enige sosiale distansiëring. Dit is interessant dat die EFF beweer dat hulle betoog teen lewensverlies tydens die onluste en plundery in KwaZulu-Natal byna ʼn maand gelede, maar tog gee hulle so min om vir die lewens en veiligheid van hul ondersteuners te midde van die dodelike Covid-19-pandemie,” het Whitfield bygevoeg.

“Terwyl gewone burgers die volle mag van die SAPD sou ervaar en vervolg sou word vir kleiner oortredings, word die EFF toegelaat om te doen wat hulle wil. Hulle stel mense se lewens in gevaar deur moontlike superverspreider-byeenkomste te hou en dreig met die geweld, vandalisme en intimidasie wat sinoniem geraak het met EFF-betogings.”

Whitfield meen die SAPD het ander reëls wanneer dit kom by die EFF. “Die SAPD versuim deurgaans om teen die EFF op te tree wanneer hulle wette oortree. Dit is tyd dat die SAPD besef hulle is nie die EFF se privaat sekuriteit nie – hulle mandaat is die veiligheid en sekuriteit van gewone Suid-Afrikaners wat gereeld deur die EFF gedreig en geïntimideer word en wie se ondernemings gereeld geteiken word deur hulle geweld en vandalisme. Dit kan nie so wees dat ʼn party wat slegs geweld aanhits en hulself aan haatspraak skuldig maak, beskerm word terwyl hulle openlik wette en regulasies oortree nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

29 Kommentare

jongste oudste gewildste
Jannie van Niekerk

Toemaar , Andre Gaum se reaksie gaan wees: “Dis nogal problematies” en dan gaan hulle absoluut NIKS doen aan die EFF nie. Inteendeel, hy sal die polsiie kritiseer indien hulle sou optree.

Jeff

Een van hulle n vrou spuit voor EWN kameras hoe hulle nie rassisme kan toelaat en hoe dit onaanvaarbaar is en en en. Maar al wat uit hierdie coke bottels kom is die wittes dit en die indiers dat. Rassisme is al wat uit hierdie leë bottels kom. Moenie maak soos ons maak, maak soos ons sê. Sirkus has come to Phoenix.

Cherokee

re… Die VF Plus sal hierdie saak opvolg in die parlement en cele sal moet verduidelik.
Pieter, ons maak staat daarop dat dit wel opgeneem sal word in die parlement, en nie slegs met ‘n terloopse vraag wat onbeantwoord bly nie. ‘n Antwoord moet geëis word waarom die polisie so vrekbang is vir die eff. Daar behoort aan ramaphosa gevra te word waarom hyself dit nie opvolg nie.
Die groot krokodil sou die weermag gebruik het om hulle uitmekaar te jaag.

Mariana

Wat kan ons meer sê. Dit is reeds gesê in die berig. Nou gaan daar weereens niks gebeur met Malema en sy hordes nie.

Stephen

Wat verwag mens van Beki Cele, die president en die res van die koruptes, die twee gesigte? Dis maklik om enkele mense op n strand te arresteer, branderplank ryers, ouers wat laat in die aand kos soek vir hulle kinders, mense wat sonder n masker loop. Maar 1500 mense en baie van hulle sonder maskers is ok. Dis toelaatbaar…. As hulle anderskeurig was, was die weermag betrokke om hulle aan te keer…..