EFF sê De-Klerk stigting is deel van ‘1652-bende’

land-lugfoto-grond-landbou

Foto: Magda Ehlers/Pexels.com

ʼn Voorlegging deur die FW de Klerk-stigting aan die grondwetlike hersieningskomitee in WAAR oor die moontlike wysiging van artikel 25 van die Grondwet om onteiening sonder vergoeding moontlik te maak het Vrydag in ʼn vurige woordewisseling tussen LP’s ontaard.

Hoewel Theuns Eloff, uitvoerende direkteur van die stigting, gesê het die stigting erken die status quo oor grondeienaarskap is nie ideaal nie, behoort die Grondwet nie gewysig te word nie.

Eloff meen die mislukkings van grondhervorming moet eerder voor die deur van onbevoegdheid van die relevante regeringsdepartement en korrupsie gelê word.

Volgens die stigting is die kwessie van kardinale belang vir die toekoms van Suid-Afrika, nie net vir suksesvolle grondhervorming nie, maar oor vir die toekoms van eiendomsregte, die toekoms van die ekonomie en die toekoms van rasseverhoudinge in die land.

“Indien die bespoedigde grondhervormingsprogram die wysiging van artikel 25 in so ʼn manier insluit dat onteiening sonder vergoeding ʼn werklikheid word, kan dit lei tot grootskaalse sosio-ekonomiese onluste, grondgrype en die onwettige bewoning van enige grond ten spyte van wie die eienaars is,” het hy gesê.

Eloff meen as die ondoeltreffendheid en gebrek aan kapasiteit van die polisie in ag geneem word, is daar ʼn werklike moontlikheid dat eienaars die wet in eie hande gaan neem. Dit kan volgens die stigting lei tot ernstige agteruitgang in rasseverhoudinge en selfs anargie en bloedvergieting.

LP’s was egter nie oortuig nie en Vincent Smith van die ANC het aangevoer as daar geen verandering in grondeienaarskappatrone is nie daar ʼn gróter risiko vir politieke onluste is gegewe die “honger” na grond in die land.

Tebogo Mokwele, LP van die EFF, het Eloff en die res van sy afvaardiging gebrandmerk as deel van “die bende van 1652”.

“Hulle beweer hulle beywer hulle vir vrede en eenheid. Nou hoe gaan ons vrede in Suid-Afrika hê as meeste van die kwesbare gemeenskappe van Suid-Afrika – wat toevallig swart is – nie toegang tot grond het nie?” wou Mokwele weet.

“In jou voorlegging het jy genoem daar sal ʼn oorlog wees; jy waarsku ons waarvoor jy jouself voorberei, jy berei jouself voor vir oorlog. Ek het bewyse daarvan,” het hy bygevoeg.

Ander LP’s het in die bres getree omdat Mokwele volgens hulle “verdelende” opmerkings gemaak het.

Annelie Lotriet, DA-LP, het gesê dis baie ongemaklik om saam met iemand te sit wat sulke soort opmerkings maak. ʼn Ander het gekla dat Mokwele die platform misbruik.

Lewis Nzimande, medevoorsitter van die komitee, het bevind Mokwele was buite orde en het by haar gepleit om duidelike vrae te vra en nie die debat te begin voordat die beraadslaging tussen LP’s in erns begin nie.

Vandag is die laaste dag wat individue en organisasies verbale voorleggings aan die grondwetlike hersieningskomitee kan maak.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

45 Kommentare

jongste oudste gewildste
Santjie

julle is soos hierdie klein hondjies wat net heeltyd blaf en geraas maak.

groot geraas

Lee blikke maak die grootste geraas! Niks pitte wat kan raas nie!

En nou?

Julius en Floyd – PAY BACK THE MONEY!!!!

honourable member

Ja en hulle die 1994 bende.

Verstom

Kan EFF so ver terug tel? Arme drommels!!!