EFF sê weer ‘Die Stem’ moet uit volkslied

Die EFF het opnuut ʼn beroep op die Suid-Afrikaanse regering gedoen om Die Stem-gedeelte uit die nasionale volkslied te verwyder.

Mbuyiseni Ndlozi, woordvoerder van die EFF, het in ʼn verklaring hulde gebring aan Enoch Sontonga wat Nkosi Sikelel’ iAfrika gekomponeer het. Sontongo is op 18 April 1905 in die ouderdom van 32 jaar dood.

Ndlozi het in die verklaring gesê Sontonga het Nkosi Sikelel’ iAfrika geskryf as ʼn simbool wat die mense van Afrika verenig in gebed. Volgens Ndlozi het die lied Afrikane wat deur Europese kolonialisering onderdruk en verneder is, se lot by God bepleit. “[Die lied] is daarom ʼn magtige pan-Afrika-simbool en -lied, wat nie oor die slegs-wit Suid-Afrika gaan wat deur die Boere-unie en Britse Republiek beoog is nie. Die Afrika van Sontonga beoog ʼn hele kontinent en sy mense as een in gebed,” het Ndlozi gesê.

“Daarom doen ons ʼn beroep op die regering om, ter ere van Sontonga, Die Stem uit die amptelike Suid-Afrikaanse volkslied te verwyder. Die insluiting van Die Stem is nie net ʼn vervalsing van Sontonga se gebed nie, maar dit wek ook die indruk dat Nkosi Sikelel’ iAfrika net volledig is wanneer Europese tale daarby gevoeg word,” het hy gesê.

“Die Stem is ʼn simbool van die regime waarteen Sontonga gebid het en wie se idee van Afrika Sontonga s’n met geweld teenoor die mensdom van Afrikane weerspreek het. Die Stem moet wegval en plek maak vir iets wat ʼn bevrydingstryd-volkslied geword het.”

Dit is nie die eerste keer dat die EFF daarop aandring dat Die Stem uit die volkslied verwyder moet word nie. Ndlozi het onder meer in 2014 tydens ’n gesamentlike sitting van die portefeuljekomitee oor kommunikasie en telekommunikasie en die posdiens hierdie uitlating gemaak en die party het dit sedertdien verskeie kere herhaal.