EFF steek ook kop in Mej. Heelal-bynes

Lalela Mswane. (Foto: Glamfuel/Facebook/Official Miss SA)

Die EFF het Woensdag ook druk op die nuwe Mej. Suid-Afrika, Lalela Mswane, geplaas om haar aan die Mej. Heelal-kompetisie in Israel te onttrek deur ʼn verklaring uit te reik waarin die party haar vra om dié apartheidstaat en die kompetisie in geheel te boikot.

Dit kom nadat ʼn verklaring Dinsdag deur die drukgroep Africa 4 Palestine uitgereik is waarin dié groep die nuus “verwelkom” dat Mswane besluit het om haar aan die kompetisie te onttrek.

Die Mej. Heelal-kompetisie, wat voorheen deur Suid-Afrikaanse skoonhede Demi-Leigh Tebow (voorheen Nel-Peters) en Zozibini Tunzi gewen is, vind op 13 Desember in Eilat, Israel, plaas.

“Die EFF sluit by alle Suid-Afrikaners en progressiewe mense van die wêreld aan in hul beroep om die Mej. Heelal-kompetisie wat in Israel plaasvind te boikot. Ons doen spesifiek ʼn beroep op Mej. SA, Lalela Mswane, om die kompetisie wat in Israel, ʼn apartheid-, volksmoord- en kriminele staat, te verwerp en veroordeel,” lui die EFF se verklaring.

“Apartheid is per definisie ʼn misdaad teen die mensdom. Die staat van Israel handhaaf die afgelope 50 jaar ʼn beleid van rasseskeiding, etniese suiwering, koloniale grondbesetting en onteiening teen die mense van Palestina. Hierdie beleid het gelei tot die onteiening van Palestyne se wonings, wat Palestina die grootste bevolking van gedwonge immigrante ter wêreld maak.

“Vir geen Suid-Afrikaner wat sy bevryding deur die internasionale boikot van Afrikaner-apartheid deur die mense van die wêreld verkry het behoort die boikot van Israel onderhandelbaar te wees nie. Ons plig is om Israel van alle kulturele, sport, godsdienstige en ekonomiese aktiwiteite te isoleer totdat sy apartheid en koloniale besetting van Palestyne tot ʼn einde kom,” het die EFF gesê.

Volgens die verklaring kan ʼn Mej. Heelal nie gekroon word in ʼn land wat “op ʼn daaglikse basis die skoonheid en menslikheid van ander mense knou nie”.

“Aan Lalela Mswane vra ons om te staan by diegene wat onderdruk word, en die skoonheid van Palestina en Palestyne eerste te laat kom. Laat dit bevestig word deur ʼn algehele boikot van hulle onderdrukker, apartheid-Israel.”

Lalela Mswane. (Foto: @Official_MissSA/Twitter)

Africa 4 Palestine het Dinsdag gesê die redes vir Mswane om haar te onttrek aan dié gesogte kompetisie, waarop Andrea Meza van Mexiko verlede jaar as wenner gekroon is, is “so duidelik soos daglig”.

“Israel se apartheidsbeleid is goed gedokumenteer deur Amnestie Internasionaal, Human Rights Watch, verskeie liggame van die Verenigde Nasies en Israel se eie menseregtegroepe soos Btselem,” lui die drukgroep se verklaring.

Die groep het voorts gesê hy het “inligting ontvang” van Mswane se onttrekking nadat talle lede van die publiek, insluitend wyle pres. Nelson Mandela se kleinseun, Zwelivelile “Mandla” Mandela, en ander bekende openbare figure ʼn beroep gedoen het dat Mswane haar aan die Mej. Heelal-kompetisie onttrek.

Die Mej. Suid-Afrika-organisasie het egter Dinsdag gerugte dat Mswane haar aan die kompetisie gaan onttrek, in die kiem gesmoor en die Africa 4 Palestine-verklaring as “fopnuus” afgemaak.

“Enigiemand wat Lalela van haar oomblik in die kollig wil beroof, is onhartlik en kortsigtig. Sy is ʼn blink baken vir jong mense oral en bewys dat jy beeldskoon kan wees terwyl jy ook slim en opgevoed kan wees,” het Stephanie Weil, hoof van die Mej. SA-organisasie, gesê.

ʼn Woordvoerder van dié organisasie het Donderdag gesê hulle het tans geen kommentaar om te lewer oor die EFF se verklaring nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

49 Kommentare

jongste oudste gewildste
Agge nee

Lalela poppie, gaan neem deel, oom joeliaaas is net suur omdat jy mooier is as hy. Moenie dat hulle jou boelie nie.

Malan

En kyk net wie doen die beroep. Hierdie is regtig ‘n klomp narre.????????????

Fritz

EFF praat namens die hele SA! Belaglik! Elke persoon het die reg om sy eie siening te hê maar as jy dit op ander probeer afdwing?

Jack

Apartheis is jare terug al iets van die verlede en steeds wil die EFF mense straf daarvoor ? Israel is ‘n baie meer belowende land as wat SA ooit sal wees en word regeer deur baie meer bevoegde mense.Is die EFF kwaad daaroor ? Israel het ‘n baie goed opgeleide weermag en polisie. Nee wat EFF julle versoek verveel my.Julle weet te min en maak te veel geraas.

Jackie

Die enigste demokratiese en suksesvolle nywerheidsland in die midde ooste. Net weereens n bewys dat die Arabiere en Afrika meelopers niks hou van iets wat werk deurdat mense bereid is om daarvoor te werk nie.