EFF wil polisielede en gesinne ‘in hul huise teiken’

Popcru sê Malema se uitlatings is ‘n oproep tot geweld teen polisielede en hul gesinne. (Foto: EFF/Twitter)

Die vakbond Popcru het uitgevaar nadat die leier van die EFF, Julius Malema, die afgelope naweek in die Vrystaat aan ʼn skare gesê het as die polisie ʼn geveg soek, moet hulle só sê.

Malema het in Mohokare tydens ʼn saamtrek gesê die polisie dink hul uniform gee aan hulle ʼn vorm van meerderwaardige mag. “Ons sal julle sien nadat julle die uniform uitgetrek het, snags in julle huise …” het die EFF-leier gesê.

“Ons sal hulle op dieselfde manier behandel as wat ons in die 80’s gedoen het. Ons sal hulle nie net by protesoptogte die stryd aansê nie, ons sal na hulle huise toe gaan en hulle in hul eie huise saam met hul eie gesinne uitdaag.

“Ons is nie bang vir die polisie nie… blêddie lafaards.

“Ons sal kom vir julle. Een vir een in julle eie gemaksones.”

Popcru het die opmerkings as neerhalend bestempel teenoor die rol wat die polisie speel in die handhawing van openbare orde.

“Hy uiter ook verdere dreigemente wat moontlik kan lei tot onregverdigbare aanvalle in gemeenskappe op polisiebeamptes en hul gesinne,” het Richard Mamabolo, woordvoerder van Popcru, gesê.

“Nes hy vantevore gedoen het, deur in September die goeie naam van ons manne en vroue in blou verbaal aan te val omdat hulle hul werk doen – tot só ʼn mate dat hy selfs hul stewels as stinkend bestempel het – het hy hierdie keer die beledigings na nuwe hoogtes geneem.

“Hy moedig nou regstreekse geweld teen polisielede en hul gesinne aan.”

Mamabolo sê dit is ʼn oproep tot wetteloosheid en dat Malema se houding nou op ʼn glibberige pad is.

Popcru sê die polisie en sy lede beskerm die regte van alle Suid-Afrikaners, ongeag hul politieke affiliasie. Mamabolo sê wanneer ook al daar beoogde betogings is, is dit standaardpraktyk dat die betrokke partye vooraf vergader om kwessies soos die handhawing van veiligheidsmaatreëls, die ontplooiing van wetstoepassingsowerhede en die nakom van munisipale verordeninge te bespreek.

“Vir iemand soos mnr. Malema, wat ook ʼn openbare verteenwoordiger is, om so laag te daal en die lewe en gesinne van wetstoepassers in moontlike gevaar te stel, is uiters onverantwoordelik. Dit kom ook op ʼn tyd wat ons by mense pleit om te help in die stryd teen polisiemoorde wat aanhou toeneem.”

Mamabolo sê Suid-Afrikaners kan nie aangemoedig word om wapens teen mekaar op te neem nie.

“Ons doen ʼn beroep op mnr. Malema om hom van sulke dreigemente te weerhou.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

99 Kommentare

jongste oudste gewildste
domheks

Hoelank gaan cr en cele dit nog toelaat???
Dit is ‘n uitdaging vir cr en cele, kom ons kyk of die stout anc seuntjie oor die vingers getik gaan word?
Laat iemand anders (WIT) sulke dinge kwyt raak, wonder hoe julle dan sou gespring het.

Androclus

Hy is rêrig siek.

Zacahara

En die Ingels aan die einde van die berig….????

Elize

Sluit die man toe en verban sy party

Deon

Hy kort n spreek woordelike “klap op die bek”