EFF wil voortveg ná hof weer teen OB beslis

EFF-woordvoerder Mbuyiseni Ndlozi. (Foto: ANA)

Die EFF sê hy gaan appelleer teen die bevinding van die Pretoriase hooggeregshof wat pres. Cyril Ramaphosa gelyk gegee het in sy besluit om tugstappe teen die minister van openbare ondernemings ter syde te stel, hangende ʼn hersieningsaansoek.

Die hof het Donderdag bevind Ramaphosa het wél voldoen aan die Openbare Beskermer (OB) se opdrag dat tugstappe teen Pravin Gordhan gedoen moet word. Die uitspraak laat Ramaphosa nou toe om te wag vir die uitslag van dié aansoek voordat hy besluit op gepaste optrede teen die minister.

Mbuyiseni Ndlozi, EFF-woordvoerder, het ná die uitspraak gesê die uitspraak is strydig met die gety van die Konstitusionele Hof. “Die remediërende optrede van die OB is nie sommer net optrede nie, dit is bindend totdat ʼn hof dit ter syde gestel het. ʼn Blote aansoek vir hersiening stel dit nié ter syde nie,” het hy gesê.

Die EFF het ter ondersteuning van adv. Busisiwe Mkhwebane, OB, by die geding betrokke te raak. Die party het gesê hy steun haar nie as individu nie, maar eerder die amp wat sy beklee.

Mkhwebane en die EFF is boonop beveel om die regskoste vir die saak te betaal. Volgens Ndlozi is die party ook van plan om hierteen te appelleer.

“Die regter het gesukkel om haar eie uitspraak te lees en sy kon nie vir een oomblik die buitengewone omstandigede in die saak staaf om die magte van die OB op te skort nie,” het Ndlozi gesê.

Die OB het haar verslag oor Gordhan se hantering van die voormalige adjunkhoof van die Suid-Afrikaanse Inkomstediens (SAID), Ivan Pillay, se vervroegde aftrede, in Mei vanjaar bekendgestel. Sy het bevind Gordhan het onwettig opgetree toe hy die aftreepakket in 2010 goedgekeur het. Gordhan was destyds die minister van finansies. Nadat die pakket goedgekeur is, is Pillay op ʼn kontrakbasis in dieselfde posisie aangestel.

As deel van die remediërende opdrag het Mkhwebane beslis dat Ramaphosa teen Gordhan moet optree omdat hy die Grondwet geskend het.

Die IVP het die beslissing verwelkom en het gesê die OB se optrede lyk soos ʼn heksejag.

“Wat betref die kostebevel wat teen die OB en ander gemaak is, is dit ʼn skande dat haar kantoor weer eens gaan moet opdok vir die koste, wat beteken Suid-Afrikaners betaal daarvoor,” het Mkhuleko Hlengwa, die IVP se woordvoerder, gesê.

“Die IVP is uiters bekommerd oor die OB se optrede en ʼn magdom kwessies wat haar persoonlik – én haar kantoor – in die gesig staar.

“Dit is jammer dat Suid-Afrikaners tans na ʼn sepie van regsake moet kyk wat voor hulle afspeel. Ons land verdien dit nie,” het Hlengwa gesê.

Hy het gesê dit is vir die party verblydend dat die howe en die regbank verseker dat die onderskeie staatsafdelings verantwoordelik gehou word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

14 Kommentare

jongste oudste gewildste
Arno Scheepers

Wat is die kans dat ENIGE regter in Suid Afrika teen cyril rampspoedig sal beslis. Daarmee sê ek nie die uitslag teen die OB en die eff was verkeerd nie. Bloot dat regters nie mans genoeg sal wees om teen cyril te beslis nie.
Die man en sy anc party stel hulle immers in hul poste aan.
Almal weet ons howe is lankal nie meer onpartydig nie

Gaitsigubib

Goeie plan! Ek hoop hulle kry nog n kostebevel teen hulle!

Manie van Worcester

Hartseer maar baie waar

aj

Wens Afriforum of iemand wil haar (OB) aankla vir belasting verkwisting en ‘n hofbevel kry wat haar verplig om PERSOONLIK die regskoste in dié saak te dra!

Johan Maritz

Ag shame die EFF soek nou weer gratis publisiteit