Egpaar op Vrystaatse plaas aangeval

Jasco en Maria Dinkelman het tydens die aanval ernstige meswonde opgedoen [Foto: Facebook]

ʼn Egpaar is Sondagaand op hul plaas digby Ficksburg in die Vrystaat deur drie mans aangeval en beroof. Jasco en Maria Cecilia Dinkelman het tydens die aanval ernstige meswonde opgedoen.

Dit is die tweede plaasaanval in ʼn bietjie meer as ʼn week wat in die Ficksburg-omgewing plaasgevind het.

Brig. Motantsi Makhele, woordvoerder van die polisie, sê Maria het teen 19:25 glo uit gewoonte gaan seker maak dat die huis se skuifdeur en veiligheidsdeur gesluit is. Hierdie deure was egter tot haar verbasing oop.

“Die volgende oomblik het drie mans op haar afgestorm. Een van die mans het ʼn vuurwapen op haar gerig. Die ander twee was met ʼn mes en byl gewapen,” sê Makhele.

Volgens Makhele het die mans Maria na die hoofslaapkamer gedwing. Jasco wou ingryp en help en is in die proses met die mes in sy linkerhand en in die nek gesteek. Maria is ook in die linkerkant van haar nek gesteek.

Makhele sê die mans het geld en vuurwapens geëis. Die egpaar het egter vir hulle gesê dat hulle nie vuurwapens besit nie. Hulle het wel R26 000 se kontant, wat in die kluis was, aan die mans oorhandig. Hulle het ook ʼn Samsung-tabletrekenaar en selfoon gebuit voordat hulle op die vlug geslaan het.

“Lede van die plaaslike landelike boerevereniging het kort daarna by die huis opgedaag om die egpaar te help. Nooddienste en die polisie is na die toneel ontbied.”

Makhele sê die egpaar het weens die meswonde baie bloed verloor.

“Nog niemand is in verband met die aanval in hegtenis geneem nie. Die polisie ondersoek klagte van huisroof en poging tot moord.”

Maroela Media het vroeër berig Catherine Cairns (61) is op 6 Julie net voor 19:00 op ʼn plaas in die Ficksburg-omgewing deur vier gewapende mans oorval en heelnag aangehou. Die mans het glo R4 miljoen in kontant van haar geëis.

Volgens kol. Thandi Mbambo, polisiewoordvoerder, is niemand nog in verband met dié voorval in hegtenis geneem nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

13 Kommentare

jongste oudste gewildste
Diline

Boere sal baie meer sekuriteit in plek moet stel op plase – hierdie plaas aanvalle gaan nie stop nie.
Mens dink dat so iets nooit met jou gaan gebeur nie. Sterkte aan hierdie boer en sy vrou – hoop julle sterk vinning aan.

ES

Mens kan nooit paraat genoeg wees nie. Ek kan nie glo daar is nog mense wat op plase woon en nie gewapen is nie.

Sterkte en beterskap aan julle en kry vir julle vuurwapens – en raak gemaklik met hulle!

JohanR

Die dae van sorgvry boer is verby. Jy met nou boer met twee oe in die agterkant van jou kop?

Tokkel

Wens die regering wil nou vir ‘n slag ook aandag gee aan die boere se aanvalle.
Mnr die President, dit is hulle wat die kos voorsien, julle moet kyk na hulle ook…

Anel

Nogal snaaks hoe hulle nooit gevang word nie. Hulle het nou baie geld en gaan dit gebruik. Hoe maak dit niemand agterdogtig nie. En huisroof! Werklik! Ek sou sê gewapend roof en huisbraak en poging tot moord! Sterkte aan hierdie boere!