(Argieffoto: Bill Oxford/Unsplash)
ʼn Egpaar is Woensdag in Polokwane in Limpopo vasgetrek vir beweerde bedrog en korrupsie ten bedrae van R2 miljoen.
Sampo Maaboyi, woordvoerder van die Valke, sê die man, destyds ʼn werknemer by die Helen Joseph-hospitaal in Johannesburg, het glo tussen 2016 en 2017 familielede en vriende genader oor moontlike sakegeleenthede in Gauteng.
“Hy het glo maatskappye, wat aan sy vriende en familie behoort, in die provinsiale verskaffersdatabasis geregistreer. Daarna het hulle glo betalings begin ontvang hoewel daar geen dienste gelewer is nie.”
Die man het na bewering dan van Gauteng na Limpopo gereis om die geld in te samel en na verskillende bankrekeninge in sy vrou se naam oorgeplaas.
Die saak is onder die Valke se aandag gebring en die egpaar, onderskeidelik 33 en 44 jaar oud, is vasgetrek.
Die egpaar sal na verwagting Vrydag in die Sekhukhune-landdroshof in Limpopo verskyn.
Nog korrupsie! Ons soek die groot visse Valke ons soek hulle. Ja dis goed die klein vissies word gevang, maar ons wag dat julle by die parlement in stap en daar begin toe sluit ASB
Verduidelik net vir my een ding. Hoe word faktures net betaal sonder om rekords te bekom dat dienste wel gelewer is. Jy betaal mos nie net sonder bewyse nie. Regtig `n lekker afdeling. Gee net geld uit.
Dit gebeur as jy maatjies is.
Diegene wat saam ontvang het en wie se bankrekeninge gebruik is het seker suur geraak omdat hulle cut te klein was.