Egpaar wéér op plaas aangeval

plaas-polisie-veld

Argieffoto

Dave (86) en Colleen (84) Elphick is Saterdagaand vir die tweede keer in minder as ʼn maand op hul plaas in die Kaapmuiden-omgewing in Mpumalanga aangeval.

Sers. Gerald Sedibe, woordvoerder van die polisie, het aan Maroela Media gesê die voorval het omstreeks 20:45 plaasgevind toe drie gewapende verdagtes geforseerde toegang tot die huis verkry het deur ʼn deur.

“Die egpaar is gedwing om op die vloer te lê en hul hond is in die proses doodgeskiet,” het Sedibe gesê.

Volgens Sedibe is die man in die arm gesteek toe hy die paniekknoppie gedruk en ʼn alarm afgegaan het. “Die aanvallers het gevlug toe die alarm afgaan.” Volgens hom is niks tydens die voorval gesteel nie.

Hy kon nie onmiddellik bevestig dat die wapens waarmee die egpaar aangeval is hul eie wapens is wat tydens die vorige aanval in Januarie gesteel is nie.

Maroela Media het vroeër berig die Elphick-egpaar moes in Januarie ure lank spook om hulself te bevry nadat aanvallers hulle oorval, vasgebind en aangerand het.

Die voorval het gebeur toe hulle by die huis aangekom en die hek oopgemaak het.

“Drie mans in klapmusse, gewapen met pangas en vuurwapens, het hulle genader en hulle in die huis in gedwing,” het Sedibe destyds gesê.

Die egpaar is gedwing om die kluis oop te maak. “Hulle is in die proses vasgebind met kabelbinders. Die vrou is met vuiste aangerand en die man is met ʼn panga geslaan,” het Sedibe gesê.

Die verdagtes het van die plaas gevlug met drie vuurwapens en ʼn onbevestigde bedrag kontant. Die egpaar kon omstreeks 14:00 daarin slaag om hulself los te wikkel en het hulp ontbied. Volgens Sedibe het hulle ook beserings opgedoen waar die kabelbinders hulle geskaaf het.

Niemand is nog in verband met enige van die voorvalle in hegtenis geneem nie.

Enigiemand met inligting oor die voorval kan sers. Sifiso Hlatjwayo by 0824489253 skakel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
Catherine

Die arme arme mense.

Lou

Ek is doodseker dis dieselfde aanvallers wat weer teruggekom het.

lizl

Selfde aanvallers. En die polisie sal hulle nie kan vang nie… want die polisie kan nie lees of skryf nie. Dit is pateties.

Maggie

Baie jammer dat julle dit vir n 2de keer moes deurmaak in so kort tydjie.Baie sterkte,julle is in ons gebede

Wilmarie

Ek weet hoe hulle voel. Dit is verskriklik! Die arme diere ontgeld dit ook.