‘Ek is ʼn rassis’, sê Agrizzi

Angelo Agrizzi, voormalige bedryfshoof van Bosasa (Foto: Dimpho Maja/ANA)

Angelo Agrizzi, die voormalige Bosasa-bedryfshoof en fluitjieblaser, het Dinsdag erken hy is ʼn rassis nadat ʼn opname waarin hy die k-woord gebruik om na sy oudkollegas Papa Leshabane en Johannes Gumede te verwys, aan die Zondo-ondersoekkommissie voorgestel is.

Paul Pretorius, wat die getuienis lei, het gesê die kommissie se regspan het die uitlatings deur Agrizzi in die klankgreep as “blatant rassisties en hoogs aanstootlik” beskryf.

Agrizzi was in die getuiebank op die laaste dag van sy getuienis. Hy het gevra dat die kommissie die hele drie uur lange video speel om te verstaan “waar dit alles vandaan gekom het” en bygevoeg hy is uitgelok.

Hy het getuig hy was “half aan die slaap” tydens die vergadering met Bosasa se uitvoerende hoof, Gavin Watson, se broer Jarred, wat Gavin se twee kinders saam gebring het. Agrizzi het aan die kommissie gesê hy het vroeër drank gedrink nadat hy deurnag gewerk het.

Die opname is wyd op sosialemediaplatforms gedeel.

“Ek is rassisties … oordeel my daarvoor … Dis in die haak,” het Agrizzi gesê voor hy verskoning gevra het vir sy uitlating en gesê het hy is “verleë en skaam”.

Hy sê hy het geweet hy word opgeneem en dat diegene wat die opname gemaak het, hulself waarskynlik wou beskerm. In die opname kan gehoor word hoe Agrizzi tekere gaan en herhaaldelik die k-woord gebruik.

Pretorius het gesê Agrizzi se rassistiese uitlatings hou gevolge vir almal in en vir die res van die land.

“Dit sal aan jou gestel word dat jou hele motivering om die fluitjie te blaas rassisme is. Wat dink jy daarvan?”

Agrizzi het geantwoord: “Ek erken ek was verkeerd; ek het die prys daarvoor betaal. Die twee mense na wie ek met die k-woord verwys, is Papa Leshabane en Joe Gumede. Ek was verkeerd en daar is geen verskoning nie.

“Wanneer mense jou dreig, vang ʼn mens sulke simpel goed aan. Dit was op my gerig en in die privaatheid van my huis gesê.”

Regter Zondo het aan Agrizzi gesê dat sy antwoord geen verskil maak aan wat hy in die opname gesê het nie. “Probeer u sê u is daarop geregtig om rassisties in jou huis te wees?” wou die kommissie se voorsitter weet.

“Voorsitter,” het Agrizzi geantwoord, “daar is geen verskoning nie. Ek vra dat u na die feite kyk. Ek het gedoen wat ek gedoen het. Ek kan nie u besluit beïnvloed nie, maar ek kan vra dat u toelaat dat die fluitjieblasers na vore kom.”

Zondo het gesê Agrizzi se getuienis sal ondersoek word soos van ʼn regter verwag word.

“Wat ek u hoor sê het, is uiters aanstootlik en onaanvaarbaar, maar dit beteken nie ek sal nie u getuienis ondersoek, oorweeg en dit hanteer soos ʼn regter veronderstel is om te maak nie.”

“Dit is al wat ek vra,” het Agrizzi geantwoord, maar later beweer die opname is ʼn poging om hom in oneer te bring.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

37 Kommentare

jongste oudste gewildste
Thinus Erasmus

En daar val alle aantuigings deur die mat, die man sal heelwaarskynlik ook nie die vrywaring teen vervolging kry soos hy belowe is nie, WANT HY IS ‘n RASSIS en het die gevreesde .. word gebruik.
Dit is mos die allerhoogste, onverskoonbare en onregverdigbare misdaad (sonde) in SA.

Msp

Ag tog, jy het niks om oor sleg te voel nie.. malema het met sy vuil en rassistiese uitsprake al die hele Suid Afrika in rassisme gedompel. Tog loop hy vry rond en iemand raak aan hom nie want die regering en howe, met alle respek gesê, bewe as hulle hom sien.

IK

Verskriklik die tronkwoord maar vloek en bespotting van God deur o.a. met uitroepe daarvan is aanvaarbaar. Natuurlik ‘n kommunistiese staat waar dit gebeur.

Johann cb

Is hierdie die eerste krake in sy verdoemende getuienis teen Staatskaping?

Wonner

Die hele k woord ding raak nou belaglik…gelukkig mag mens dink wat jy wil(of mag ons dit ook ni meer doen nie?)Hulle kan ons beledig en slegse nes hulle wil …dis niks.Ek kyk gisteraand op die nuus hoe n EFF n blanke vrou uit jou in die hof…sy vinger voor haar rondswaai en haar openlik met haat in sy oeë beledig,dis reg maar moet netni die k woord gebruik nie ,lyk vir my jy kan eerder moord pleeg as om dit te sê.