‘Ek sál nog president word’ – Malema

Julius Malema spreek Donderdag sy ondersteuners buite die Johannesburgse hooggeregshof toe. (Foto: EFF/Twitter)

“Ek gaan nog president van hierdie land wees, of jy nou daarvan hou of nie.”

Só het Julius Malema aan Mark Oppenheimer, AfriForum se regsverteenwoordiger, Donderdag tydens sy laaste dag in die getuiebank van die gelykheidshof in Johannesburg gesê.

Oppenheimer het tydens die aanhoor van AfriForum se siviele saak oor die lied “Skiet die boer” dit aan Malema gestel dat die EFF waarskynlik nooit aan bewind sal kom nie, aangesien hulle in die afgelope plaaslike verkiesing landwyd maar sowat 10% van stemme gewerf het.

“Ek sal besluit oor die sake van hierdie land en ek sal besluit oor jou,” was die EFF-leier se reaksie daarop.

“Ek dink jy moet begin aanpas by daardie werklikheid. Hoe gouer jy dit doen, hoe minder borspyne sal jy hê wanneer daardie dag aanbreek.”

“Watter borspyne?” wou Oppenheimer toe weet.

“Rassistiese borspyne,” het Malema hom geantwoord.

Julius Malema in die getuiebank. (Foto: EFF/Twitter)

Die politieke leier het in sy getuienis ook erken dat hy wit mense aanspreeklik hou vir die “sondes van hul voorvaders” en dat hy nie kan waarborg dat hy nie vorentoe ’n beroep vir die slagting van wit mense sal doen nie.

Oppenheimer het in die hof spesifiek verwys na Malema se omstrede uitlating in 2016 toe die EFF-leier in KwaZulu-Natal gesê het dat die EFF “ten minste vir nou” nie vir die slagting van wit mense sal vra nie.

“So, jy kan in die toekoms moontlik vra vir die slagting van wit mense?” wou Oppenheimer by Malema weet, wat op sy beurt gevra het waarom hy só iets sal doen. Malema het egter in dieselfde asem erken dat hy nie kan waarborg dat hy dit nié sal doen nie.

“As ek jou vra om te belowe dat jy nooit sal vra vir die slagting van wit mense nie, sal jy daardie belofte maak?” wou Oppenheimer weet.

“Ek sal dit met gemak doen.”

“Maak dan daardie belofte,” was Oppenheimer se bevel.

“Hoekom sal ek dit doen?”

“Ek vra jou om daardie belofte te maak.”

“Ek sal dit nie doen nie.”

“Aaa, ek verstaan,” was Oppenheimer se antwoord daarop.

  • Die saak het Vrydagoggend hervat. Die respondente het hul laaste getuie, prof. Elizabeth oftewel Liz Gunner, ’n kenner van struggle-liedere en Afrika-literatuur, na die getuiebank geroep.

Lees Maroela Media se vorige berigte oor Malema se getuienis in die gelykheidshof hier.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

83 Kommentare

jongste oudste gewildste
Pietertjie

Só begin sy onderrok al meer uithang.

Jannie

Is daar ‘n drukfout in die opskrif? Lyk so!

Cobus

Die reenboog demokrasie droom van baie in werking.

Diets

Haat is ‘n lelike ding…

FM

Here wees ons genadig en bewaar ons.