‘Ek sou my honde sélf doodgemaak het’

Argieffoto ter illustrasie

Die eienaar van die twee Rottweilers wat ʼn sesjarige seuntjie doodgebyt het, sê hy as hy daar was, sou hy die honde self doodgemaak het om die tragedie te voorkom.

Jonathan January het met die Cape Times gepraat oor die voorval waarin die sesjarige Kaapse seuntjie Uriel Ockhuis naby sy huis in Hillview, tussen Retreat en Muizenberg in die Suid-Skiereiland, 72 keer deur sy Rottweilers gebyt is.

“Ek wil net vir mense sê hoe ek regtig voel oor wat gebeur het,” het hy aan dié dagblad gesê. “Ek het nog altyd alle voorkomingsmaatreëls probeer [om die honde binne te hou]; daar is groot hekke met slotte wat gesluit word.”

Hy het gesê die seuntjie se lewe is vir hom meer werd as ʼn hond sʼn. “Ek kan nie wat gebeur het, ongedaan maak nie. Ek kan net sê hoe ek voel.”

January sê as hy daar was en dit sien gebeur het – want sy honde het nog nooit enige aggressie getoon nie – sou hy sy eie hond se keel afgesny het omdat hy meer vir kinders omgee.

Die Stad Kaapstad se wetstoepassingsafdeling en die DBV het die diere dieselfde aand nog kom haal om hulle van kant te maak.

Nadat hy gehoor het Uriel se ouers is in die Retreat-daghospitaal, het hy soontoe gegaan en het die pa hom vertel hul seuntjie is dood. “Die pa het my omhels en ons het saam die hospitaal binnegegaan,” het hy aan die Cape Times gesê. “Dit was toe dat alles om my donker word en my bene meegegee het.”

Ek wil net vir almal, ook die gemeenskap, sê ek is regtig baie, baie jammer.

Nadat hy bygekom het, het hy met Uriel se bedroefde gesin gaan praat. “Ek wil net vir almal, ook die gemeenskap, sê ek is regtig baie, baie jammer.”

Maroela Media het Woensdag berig Uriel het die afgelope week saam met maatjies gespeel toe die twee Rottweilers hom aanval. Sy getraumatiseerde ouboet Morné Ockhuis, ousus Stacey-Lee Adams en ʼn buurvrou het klein Uriel probeer red, maar vergeefs. Hy is meer as 70 keer gebyt.

Morné het aan die koerant gesê hy het nog nie tot verhaal gekom nie en is steeds te geskok om te sê hoe hy voel nadat sy boetie voor hom aangeval is.

Toe Uriel se sibbes en die buurvrou op die toneel aankom, het hy op sy maag gelê en om hulp geskree, maar die honde wou nie laat los nie.

Sy suster het gesê nadat hulle hom hospitaal toe geneem het, kon sy dit nie verduur om na hom te kyk nie omdat dit hartverskeurend was. “Baie mense is getraumatiseer deur wat hulle gesien het.”

Uriel, wat aanstaande jaar skool toe sou gaan, is met sy aankoms by die hospitaal dood verklaar.

Die honde het na bewering uit hul eienaar se erf ontsnap nadat iemand die hek oopgelos het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

77 Kommentare

jongste oudste gewildste
Wessel

Dit help nogal wat jy sê, almal het nou simpatie.

M'Lady

Mnr January, hoeveel liefde het hierdie honde ontvang of het hulle hulle dae in die agterplaas deurgebring? Honde moet altyd volkome deel van die gesin wees. Hulle was tien teen een uiters gefrustreerd met hulle omstandighede. Mense wat nie 100% vir hulle diere gee nie moet beslis nie honde aanhou nie.

O aarde

Die man neem ten minste verantwoordelikheid. In ander gevalle die afgelope tyd het die eienaar net sy skouers opgetrek, soos die geval van die politikus in Bloemfontein.

Ekke

Regering se skuld……..as ons nie in so n land gebly het nie, was dit nie nodig vir sulke kwaai honde…..

DS

Ag Ekke jy is nou belaglik! Die regering kan wraggies nou nie die skuld kry vir watter tipe hond mense het nie. Glo my voor 1994 het mense ook die tipe honde gehad.