Dit gaan onder die omstandighede beter met die tienjarige Rae Braun – die enigste oorlewende van ’n motorongeluk wat die afgelope naweek haar pa en ousus geëis het. Dít sowat ’n maand ná haar ma se dood.
Rae het steeds bloeding op die brein, maar dit lyk nie in dié stadium of sy ’n breinoperasie sal moet ondergaan soos daar kort ná die ongeluk verwag is nie.
“Sy is wakker. Sy gesels en sy kan haar tone beweeg. Haar lewensfunksies lyk ook alles baie goed,” vertel Collette Daraujo, ’n familielid, Maandagoggend.
Rae se dokters het egter aanbeveel dat die familie nog nie die nuus van haar pa en sussie se dood met haar deel nie.
“Sy was baie bly om haar ouma te sien. Ek dink wel sy vermoed iets. Sy vra heeltyd na hulle,” vertel Daraujo.
Clint Braun (38) en sy dogter Alexus (12) is Vrydag dood toe hulle en Rae in ’n ernstige motorongeluk op pad skool toe in Uvongo aan die KwaZulu-Natalse Suidkus betrokke was.
Maroela Media het vroeër berig Braun was die betrokke oggend op pad om sy twee dogters by die skool te gaan aflaai toe hul gesinsmotor teen ’n boom langs die R620 gebots het. Braun het na bewering weens water in die pad beheer oor die motor verloor. Die motor het die pad verlaat en teen die boom gebots.
Braun en Alexus was by paramedici se aankoms nog in die wrak van die gesinsmotor vasgekeer. Hulle is later uit die wrak bevry maar hul toestand het versleg en albei is op die toneel dood verklaar.
Rae is ná die ongeluk met onder meer lies- en breinbeserings na die Port Shepstone- provinsiale hospitaal gehaas waar sy tans nog behandel word.
Die familie doen intussen alles in hul vermoë om geld in te samel sodat Rae na ’n private hospitaal oorgeplaas kan word.
Klik hier om meer te wete te kom oor Rae se toestand en die geldinsameling.
Tragies. My simpatie.
ai jinne, hoe bitter hartseer :( my innige simpatie
Agh my hartjie breek vir jou my kind…. 3 belangrikste mense in jou lewe sommer net so weggeruk! Baie sterkte aan die familie, om die nuus te breek gaan ongelooflik moeilik wees.
Hartseer verby.
Ai nee die arme kind!! Sommige mense word darem maar n bitter hand gedeel in hierdie lewe. Ontsettend hartseer.
My hart gaan uit na jou liewe kind!
Ag nee..ek verstaan nie die lewe..meer hartseer en verdriet as plesier! Dis wraggies n uitdaging om positief te bly terwyl SO baie mense soveel hartseer het…die arme kind..en ouma….ai