Esbé Koster se moordenaar gevonnis

Esbé Koster. Foto: Verskaf

Die jong man wat erken het dat hy Esbé Koster (50), ʼn sekretaresse van ʼn skool in Brits in Noordwes, koelbloedig vermoor het, is Dinsdag in die hooggeregshof in Pretoria gevonnis.

Regter Bert Bam het die 18-jarige man, wie se naam nie bekendgemaak word nie aangesien hy minderjarig was ten tyde van die misdaad, tot 15 jaar tronkstraf gevonnis op aanklag van moord, 10 jaar tronkstraf vir roof met verswarende omstandighede, 10 jaar vir ontvoering, vyf jaar vir die onwettige besit van ʼn vuurwapen, drie jaar vir die onwettige besit van ammunisie en nog 10 jaar vir diefstal van ʼn vuurwapen.

Die vonnisse vir ontvoering, onwettige besit van ʼn vuurwapen, onwettige besit van ammunisie en diefstal sal gelyklopend met dié vir die ander twee aanklagte uitgedien word. Hy sal dus effektief 25 jaar tronkstraf uitdien.

Koster se familie was in die hof toe die vonnisuitspraak gelewer is. Jan Koster, Esbé se man, het ná afloop van die hofverrigtinge aan Maroela Media gesê geen vonnis sal ooit sy vrou kan terugbring nie, maar die familie is wel tevrede met die vonnis.

Maroela Media het vroeër berig Koster, die destydse sekretaresse van die Rabboni Christian School, se liggaam is op 22 November 2016 langs die Ou Lethlabile-pad naby Brits gevind. Sy is in haar kop geskiet. Twee leerders van die skool, toe onderskeidelik 16 en 17 jaar oud, is die dag ná die moord by die skool in hegtenis geneem.

Die tweede beskuldigde in die saak het skuld op al die aanklagte teen hom ontken. Die twee beskuldigdes se sake is gevolglik van mekaar geskei en beskuldigde nommer twee sal 18 tot 22 Junie in die hooggeregshof verhoor word.

Hou Maroela Media dop vir meer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

9 Kommentare

jongste oudste gewildste
Alida

Mooi Regter Bam ons maak altyd staat op u vonnisse.

Plantasiegorilla

Swart moord – 15 jr. Wit kis dreigement – 15 jr. ???!! Huh, iewers is n skroef los. Viva rsa se nie rassigge demokrasie.

Ekwilibrium

Selfs al sit hy die volle 25 jaar, gaan hy maar 43 jaar oud wees as hy uitkom. Wat gaan hy dán doen? ‘n Getroue, bydraende lid van die samelewing wees? Asseblief…

christa

Dankie regter Bam dat jy die moordenaar sommer ‘n goeie vonnis op gele het. So jammer vir die agtergeblewendes.

Lizl

Ek dink die straf kon maar swaarder gewees het. Wanneer gaan howe begin om `n standpunt in te neem deur lewenslank te vonnis vir moord ?