Eskom beplan om krag te sny by munisipaliteite wat nie betaal nie

Argieffoto (Foto: SnapwireSnaps, Pixabay)

Argieffoto (Foto: SnapwireSnaps, Pixabay)

Eskom het alle partye in kennis gestel wat moontlik geraak sal word indien die maatskappy die kragtoevoer op 5 Junie sou afsny by 20 munisipaliteite wat agterstallig is met hul betalings.

Die totale bedrag van munisipaliteite wat al langer as 30 dae agterstallig is, beloop R4.6 miljard. Die betrokke 20 munisipaliteite se skuld beloop R3.68 miljard vir die grootmaatvoorsiening van elektrisiteit.

“Wanbetaling ondermyn Eskom se statutêre verpligting om elektrisiteit nasionaal op ʼn finansieel volhoubare basis aan munisipaliteite te verskaf,” het Zethembe Khoza, waarnemende uitvoerende hoof van Eskom, in ʼn verklaring gesê. “Ons het dus besluit om ons reg uit te oefen kragtens die Wet op Elektrisiteitsregulering en die verskaffingsooreenkoms met munisipaliteit, wat ons toelaat om die elektrisiteittoevoer na munisipaliteite wat nie betaal nie, af te sny.”

Khoza het bygevoeg dat die maatskappy bewus is daarvan dat die afsluiting van elektrisiteit sommige verbruikers en lede van die gemeenskap swaar sal tref en die verskaffing van ander dienste ook negatief sal beïnvloed, maar bygevoeg dit is die laaste uitweg.

Eskom oorweeg om elektrisiteit dus op ʼn gereelde basis soos volg af te skakel:
Maandag tot Vrydag: 06:00 – 10:00
Maandag tot Vrydag: 17:00 – 21:00
Saterdag tot Sondag: 07:00 – 10:00
Saterdag tot Sondag: 17:00 – 20:00

ʼn Lys van die munisipaliteite per provinsie sal op 30 April in plaaslike media gepubliseer word. Verbruikers binne hierdie munisipaliteite sal voldoende kennisgewing gebied word en sal skriftelike vertoë aan Eskom kan rig.

Die lys van die top-20 munisipaliteite wat agterstallig is (in geen spesifieke volgorde nie):
– Maluti-a-Phofung munisipaliteit (sluit Harrismith en Kestell in die Vrystaat in)
– Matjhabeng munisipaliteit (sluit onder andere Welkom in die Vrystaat in)
– Emalahleni plaaslike munisipaliteit (sluit Kriel, Ogies en Witbank in die Mpumalanga in)
– Ngwathe plaaslike munisipaliteit (sluit Parys en Vredefort in die Vrystaat in)
– Thaba Chweu plaaslike munisipaliteit (sluit Graskop, Pelgrimsrus en Sabie in Mpumalanga in)
– Lekwa plaaslike munisipaliteit (sluit onder andere Standerton in Mpumalanga in)
– Govan Mbeki munisipaliteit (sluit Evander, Secunda en Trichardt in Mpumalanga in)
– Stad Matlosana plaaslike munisipaliteit (sluit Stilfontein, Orkney en Klerksdorp in Noordwes in)
– Naledi plaaslike munisipaliteit (sluit Wepener en Dewetsdorp in die Vrystaat in)
– Thabazimbi plaaslike munisipaliteit (sluit Northam en Thabazimbi in Limpopo in)
– Msukaligwa plaaslike munisipaliteit (sluit Ermelo en Davel in Mpumalanga in)
– Lichtenburg munisipaliteit (sluit Lichtenburg en Coligny in Noordwes in)
– Nala plaaslike munisipaliteit (sluit Bothaville en Wesselsbron in die Vrystaat in)
– Makana plaaslike munisipaliteit (sluit Grahamstad en Alicedale in die Oos-Kaap in)
– Madibeng plaaslike munisipaliteit (sluit Brits, Hartebeespoort en Pelindaba in Noordwes in)
– Randfontein plaaslike munisipaliteit (sluit Randfontein in Gauteng in)
– Dihlabeng munisipaliteit (sluit Bethlehem, Clarens en Fouriesburg in die Vrystaat in)
– Nketoana plaaslike munisipaliteit (sluit Arlington, Petrus Steyn en Reitz in die Vrystaat in)
– Nama Khoi plaaslike munisipaliteit (sluit Springbok, Vioolsdrif en Okiep in die Noord-Kaap in)
– Westonaria plaaslike munisipaliteit (sluit Bekkersdal, Modderfontein en Westonaria in Gauteng in)

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

26 Kommentare

jongste oudste gewildste
Evert Bouwer

Wil voorkom of dit net anc beheerde munisipale gebiede is, laat n mens dink, geen in die Wes Kaap, dankie DA!

Jan

Wat van Soweto ?

Neptunus

Onder watter van die munisipaliteite val Soweto?

Bruno Stef

Eskom julle tweegat jakkalse wat van die grootste nie betalende verbruikers naamlik Die Groter Soweto wat direk deur julle bedien word en al jare daarmee wegkom.Ek het n voorstel skakel hulle volgens julle spitstyd rooster af of is julle bang dit is nie Polities Korrek nie of die stelsel gaan dan gevandaliseer word wat weer baie gaan kos om te herstel.Ek weet waarvan ek praat omdat ek Jare lank self met Soweto se wanbetalings probleem gesukkel het om te probeer dat hulle betaal vir dienste gelewer MAW kry vir JULLE.

Tish

Mooi so KZN..maar hoekom sit ons gereeld sonder krag veral opdie suidkus, buiten beurtkrag.