Eskom-hoë: ‘Dít is die beurtkrag-situasie’

Foto: Twitter

Eskom is vol vertroue dat beplande kragonderbrekings voorlopig iets van die verlede is. Hy meen ook die instandhouding wat hy in Desember aan sy kragsentrales doen, sal die kans op beurtkrag van middel Januarie af verminder.

Andrew Etzinger, waarnemende hoof van kragopwekking by Eskom, het Dinsdagoggend tydens ʼn onderhoud op Jacaranda FM se ontbytprogram Breakfast with Martin Bester gesê daar is “vroeë tekens van herstel” by die kragvoorsiener.

Wat die vooruitsig van beurtkrag in Desember betref, het Etzinger gesê die vraag na elektrisiteit is altyd laer in Desember omdat nywerhede vir die vakansie sluit. “Vandeesweek sal die vraag wel nog hoog wees, maar goeie werkverrigting deur ons kragsentrales sal waarskynlik neerkom op geen beurtkrag dié week nie.”

In volgende week, wanneer die vraag selfs laer behoort te wees, wil Eskom die kans benut om heelwat instandhouding aan sy kragsentrales te doen, het Etzinger gesê. “En dan, teen middel Januarie, wil ons seker maak dat die onderhoudswerk wat ons nou doen, sorg dat ons kragopwekkers in ʼn betroubare toestand is.”

Hy het begrip daarvoor dat Eskom onder skoot kom ná twee weke van beurtkrag en erken wanbestuur is een van die redes waarom die kragvoorsiener hom in die huidige benarde situasie bevind.

Ons het tien uitvoerende hoofde in die afgelope ses jaar gehad.

“Van die aantygings is in sommige gevalle gegrond,” het Etzinger erken. “Ons het ʼn paar jaar van baie onstuimige bestuursveranderings in die organisasie agter die rug, iets in die omgewing van tien uitvoerende hoofde in die afgelope ses jaar.

“En natuurlik bevind Eskom hom in die middel van die ‘staatskapingsepisode’, wat beteken daar was senior bestuurders in Eskom wat veel meer daarin belanggestel het om hulself te verryk as om die ligte aan te hou.”

Bester wou by hom weet of die bedrag van R1,4 biljoen (“trillion”) wat korrupsie by Eskom die land volgens die energiekenner Ted Blom gekos het, ongegrond en “te bisar” kan wees. “Nee, ek dink nie [dis verregaande] nie,” het Etzinger geantwoord. “Of dit R1,4 biljoen of R400 miljard is, dis baie.”

Hy het verduidelik van die kontrakte wat Eskom met myne gesluit het om steenkool aan hulle te lewer, was nie bo verdenking nie. Nadat dit aan die lig gekom het, is die myne in ondernemingsredding geplaas, wat die verskaffing van steenkool onderbreek het.

Ons het baie hard daaraan gewerk om kragonderbrekings stop te sit.

“Ons het baie hard daaraan gewerk om kragonderbrekings stop te sit en vandag kan ons dit regkry, maar om dié toestand te handhaaf, sal aggressiewe en duur instandhoudingswerk verg aan eenhede wat die afgelope paar jaar effens afgeskeep is.”

Gevra wat die situasie met steenkool is na aanleiding van die “fopnuus” dat berge steenkool na China uitgevoer word terwyl Eskom kla oor ʼn tekort daaraan, het Etzinger gesê hulle ervaar wel ʼn tekort by ʼn aantal kragsentrales wat minder steenkool het as die ideaal.

Hy sê hulle het die afgelope twee weke goeie vordering gemaak om voorrade by kragsentrales op te bou, maar in sommige gevalle het die steenkool wat ontvang is, nie aan die gehaltemaatstawwe voldoen nie.

Etzinger sê Suid-Afrika voer wel steenkool uit. Dit benadeel Eskom omdat die vraag na steenkool uit die buiteland dié brandstof se prys verhoog, maar dis nie die rede vir die tekort daaraan wat die kragvoorsiener ervaar nie.

Ten spyte van Etzinger se versekering, waarsku Eskom intussen in ʼn persverklaring wat hy Maandagaand laat uitgereik het die kragnetwerk “bly kwesbaar en wisselvallig”. Hy gee die versekering dat beplande kragonderbrekings net toegepas sal word as dit “absoluut noodsaaklik” is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

31 Kommentare

jongste oudste gewildste
Eléne

Mnr sorg net dat ons krag het. Ons woon nou in n ‘oorlog geteisterde land’ net al die dreigemente van moord op ons boere vroue kinders en selfs diere. Ons Wil nie weet wat Eskom se probleme is nie. Eskom het ons land finansieel beroof van miljarde rande. Sorg net dat ons krag het!!!!

Skroef

Beurtkrag is eskom se manier van manipulasie elke keer as hulle verhogings buitensporig hoog is. Hulle kan die onwettige gebruikers opskryf en die gratis krag en sommer die hoe meer jy koop hoe duurder word dit twak los. Een kW, een prys al koop jy R2000 in Naval Hille of R20 in Nyanga.

Tiaan

Elke dag ‘n ander storie

Karolis

Tien uitvoerende hoofde in ses jaar, vertel ook ‘n storie.

Johan

Kan iemand wat meer kennis het my verduidelik hoekom ons steenkool uitvoer die petrol prys opjaag?Ek verstaan nie die korrekasie nie.