Eskom mag miljarde rande van verbruikers verhaal

(Foto: pixabay)

Eskom het pas vergunning gekry om byna R13,3 miljard van verbruikers te verhaal.

Die Nasionale Energiereguleerder (Nersa) het Eskom toestemming gegee om dié geld vir die 2018-’19-boekjaar van sy plaaslike en internasionale kliënte te verhaal.

Die verhaling is bykomend tot die jaarlikse elektrisiteitsverhoging.

ʼn Plan vir die inwerkingstelling van die invorderingsbalans moet nog goedgekeur word.

Nersa sê hy boekstaaf dat sekere bestuurspraktyke by Eskom in die slag gebly het en dat die omvang daarvan nog nie heeltemal bepaal is nie.

“Nadat enige ondersoeke deur regeringsinstellings of kommissies na dié bestuursprobleme afgehandel en die hoeveelheid daarvan bepaal is, kan die energiereguleerder in toekomstige Eskom-aansoeke aanpassings aan Eskom se inkomste maak, afhangende van die uitslag van só ʼn ondersoek,” het Nersa gesê.

Eskom het in Augustus verlede jaar toestemming gevra om meer as R27 miljard in te vorder. Nersa het dié aansoek in oorleg met die bepalings van die vierde veeljarige prysvasstelling (MYPD4) oorweeg. Ná verskeie vergaderings met Eskom is ʼn gewysigde aansoek in November ingedien.

Eskom se aansoek word oorweeg deur te kyk na die kragvoorsiener se toegelate inkomste en uitgawes en dit op te weeg teen sy werklike inkomste en uitgawes, asook die aanpassings wat vir prestasieaansporings gemaak is.

Nersa sê hy het die besluit geneem nie net op grond van Eskom se belange nie, maar ook dié van die publiek.

Nersa sê hy sal redes vir dié besluit voorsien nadat daar aan die nodige bepalings, wat die vertroulikheid van sommige inligting insluit, voldoen is. Dit sal mettertyd op Nersa se webwerf geplaas word.

Eskom steier onder skuld van nagenoeg R450 miljard en moes die afgelope paar jaar talle kere bakhand by die regering staan vir reddingsboeie om die ligte aan te hou. André de Ruyter, Eskom se uitvoerende hoof, het vroeër gesê daar is sowat ʼn dekade lank nie behoorlike instandhouding aan die netwerk gedoen nie.

De Ruyter sê Eskom het die landwye staat van afsondering gebruik om korttermyn-instandhoudingswerk te doen – tóg kan die moontlikheid van beurtkrag dié winter steeds nie uitgeskakel word nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

41 Kommentare

jongste oudste gewildste
SomeOne

en nou moet ons as verbruiker die las dra vir 10 jaar se nie instandhouding deur die c anc er

Plaaskind

die mense kan mos nie vir mens laat betaal vir iets waarvoor jy alreeds klaar te veel betaal het nie. stssssk.

PH

Hoekom moet ek verantwoodelik gehou word vir die nalatigheid van ander ?

Deon

Waarvoor moet hulle prestasie aansporings betaal? En waarom moet die publiek daarvoor betaal? Betaal Soweto se mense al hul rekeninge?

Jan

Hille koet maar verhaal. Weet nie wie het nog geld nie