Eskom onderteken ʼn lening vir hernubare energie

Argieffoto: GCIS

Die Nuwe Ontwikkelingsplan (NDB) en Eskom het Maandag ʼn leningsooreenkoms van $180 miljoen (sowat R2, 55 biljoen) onderteken om 670 megawatt se hernubare elektrisiteitsprojekte by Suid-Afrika se nasionale energienetwerk te voeg.

Volgens die ooreenkoms sal die bank ʼn lening verskaf wat as waarborg sal dien vir Eskom se hernubare energie-integrasie en ʼn transmissieversterkingsprojek.

Xian Zhu, die bank se visepresident, en Calib Cassim, Eskom se finansiële hoof, het die leningsooreenkoms tydens die vierde jaarlikse vergadering van die NDB in Kaapstad onderteken.

In ʼn gesamentlike verklaring het die NDB gesê moderne verbindingsinfrastruktuur sal gebruik word vir hernubare elektrisiteitsprojekte en die aanvulling van Eskom se transmissienetwerk in geïdentifiseerde gebiede.

Die bank het ook gesê die projek sal help om voorsiening van elektrisiteit te verhoog aan die gebiede wat vir volhoubare ontwikkeling bestem is. Dit stem ooreen met die bank se fokus om projekte te steun wat daarop gemik is om hernubare energiebronne te ontwikkel.

Die Brics, wat uit Brasilië, Rusland, Indië, China en Suid-Afrika bestaan, het die NDB gestig om hulpbronne vir infrastruktuur en volhoubare ontwikkelingsprojekte in dié lande en ander opkomende ekonomieë te skep.

Zhu het gesê hulle is bly om hierdie belangrike projek te ondersteun wat tot die ontwikkeling van die netwerkverbindingsinfrastruktuur in Suid-Afrika sal bydra.

“Dit bied ondersteuning aan Suid-Afrika om na volhoubare energie te skuif. Hierdie ondersteuning is ten volle in ooreenstemming met die bank se mandaat en ons rol as ʼn betroubare ontwikkelingsvennoot.”

Cassim het op sy beurt gesê Eskom verwelkom die ondersteuning van die NDB en die elektrisiteitsreus sien uit na ʼn waardevolle vennootskap.

“Die suksesvolle afhandeling van hierdie intreetransaksie met die NDB sal ook aansienlik bydra tot die bestuur van Eskom se doelwitte om Suid-Afrika se koolstofvoetspoor te verminder,” het Cassim gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

19 Kommentare

jongste oudste gewildste
John

… ‘n lening as waarborg… en wie gaan dit terugbetaal? Dis miskien lekker in die army, maar ons die burgers van die mielieblaarklub is siek en sat vir Eskom se truuks. Eers nee vir hernieubare energie en dan ja aan Brics se nuwe bank wat skaars grond gevat het… en Shu die skuld hoop klaar op Mr Cassim… met rente…

Sean

Dis die begin van die einde

Lynette

China, hire kom ons!!!!

Verdwyn

Maar net nóg geleende geld waarvan miljoene weer gaan wegraak in die diep donker hool, en dan betaal die verbruiker op die einde van die dag net meer-en-meer. Nimmer-eindige bose siklus in die afgrond in. Emigrasie die beste opsie.

aj

#EKSDOM moetval!!! … verdwyn!

Alles waaraan die ANC en Eksdom raak verander in ….mis
luk … misluk … misluk !!!

Elke huis moet in ‘n klein kragstasie omskep word wat in sy eie kragbehoeftes voorsien … en surplus.krag lewer aan die netwerk … teen vergoeding!!!

Dis volhoubare kragvoorsiening en werkskepping!