Eskom se verknorsing verdiep

Jabu Mabuza, raadsvoorsitter van Eskom (Foto: Nhlanhla Phillips/African News Agency/ANA)

Eskom bly in diep geldelike moeilikheid terwyl hy die miljarde rand probeer terugkry wat hy verloor het deur korrupsie, asook wanbetaling deur verbruikers, groot klante en munisipaliteite, het Jabu Mabuza, Eskom se raadsvoorsitter en waarnemende uitvoerende hoof, Woensdag aan parlementslede gesê.

Mabuza het Eskom se jaarverslag met sy geouditeerde finansiële state aan die parlementêre portefeuljekomitee oor openbare ondernemings voorgelê. Daarin word ʼn verlies van R21 miljard, 30 dae van beurtkrag en ʼn R6,5 miljard-dieselrekening om die uitwerking van beurtkrag te probeer versag, weerspieël. Die verslag is vir die 2018-’19-boekjaar.

Mabuza het gesê Eskom probeer geld terugkry ná jare van korrupsie en duisende sake is reeds na die Spesiale Ondersoekeenheid (SO) verwys. Dit is weer na die Nasionale Vervolgingsgesag (NVG) vir oorweging gestuur.

Die beleërde kragvoorsiener hou ook vol die sogenaamde kultuur van wanbetaling begin ʼn al hoe groter tol eis: munisipale skuld aan Eskom het nou al die R20 miljard-kerf verbygesteek.

“Ons formule is gebreek. Ons verkoop nie wat ons produseer nie en as ons dit verkoop, betaal mense nie daarvoor nie,” het Mabuza gesê.

Volgens hom dek elektrisiteitsverkope bloot net nie meer die koste van opwekking nie.

Eskom se inkomste het in die boekjaar met 3% gestyg.

Mabuza het LP’s ook op die hoogte gebring van planne om Eskom te ontbondel en in drie afsonderlike entiteite te verdeel. Die plan gaan steeds voort, maar volgens Mabuza sonder enige werksverliese. Pres. Cyril Ramaphosa gaan na verwagting aanstaande maand meer besonderhede daaroor bekend maak.

Maroela Media het vroeër berig die parlement se staande komitee oor openbare rekeninge (Skoor) het ook ingrypende veranderinge by Eskom aanbeveel in sy konsepverslag oor die kragvoorsiener se probleme.

Spesifieke aanbevelings is gedoen oor verbeteringe by die nuwe kragsentrales, Medupi naby Lephalale (Ellisras) en Kusile in Mpumalanga.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

38 Kommentare

jongste oudste gewildste
Kolle

Netwerk gaan ingee nie lank van nou af.

aj

Soweto betaal reeds vir 30 jaar geen elektrisiteit … en almal weet dit.

Die ANC sal moet kies tussen Soweto (wanbetalers) en Suid Afrika!

Of ons gaan onder!

Ore

As elke inwoner in Soweto net R50pm betaal sal dit klaar ‘n positiewe uitwerking teweeg bring.Die ANC maai nou wat hulle gesaai het.

Chris

Eskom is volgens alle maatstawe tegnies bankrot. SA regering hou hul aan die lewe, maar vir hoe lank sal hulle dit kan volhou? SA is besig om oor afgrond te stort. Lankal al. Uitgerekte, stadige proses
Te veel krake begin nou al hoe groter raak. Die mense van SA verarm en raak al hoe ongeduldiger met hul hopelose omstandighede. Stakings, optogte, rooftogte, xenophobia, is die simptome van ernstige probleme
Kom hier dalk n soort van n rewolusie dalk? African Spring?

Chris Ws

Escom moet sy krag verkope aan buurlande erg afskaal of staak.Dis ‘n groot probleem en veroorsaak dat ons beurt krag kry.Hulle moet konsentreer om krag op te wek vir Suid Afrika.Die bure kan agterna kom as dinge verbeter.En die invordering van Escom se reuse skuld deur munisipaliteite behoord deur die regering gedryf te word.Dan die miljoene stemmers wat NIE vir krag betaal nie moet gedwing word om elk ten minste R100 per maand “flat rate” te betaal.Dit sal ‘n reuse inkomste verseker.Die huidige lojale betalende krag verbruiker is besig om uit die mark geprys te word en verminder hul krag… Lees meer »