Etzebeth, MRK vergader oor klag

Eben Etzebeth. Foto: Twitter

Die Springbok Eben Etzebeth het Donderdag met verteenwoordigers van die Menseregtekommissie (MRK) in Johannesburg vergader nadat ʼn klag teen hom aanhangig gemaak is.

Die klag hou verband met ʼn beweerde bakleiery die naweek buite ʼn kroeg in Langebaan aan die Weskus.

ʼn Man beweer hy is deur ʼn groep mans aangerand en rassistiese aanmerkings toegesnou. Daar word beweer die woord “h*tn*tte” is gebruik. ʼn Video met kru taalgebruik word intussen ook op sosiale media gedeel.

Etzebeth het vroeër ontken dat hy enigiemand aangerand of rassistiese aanmerkings toegesnou het tydens die voorval.

Volgens SA Rugby was die doel van die vergadering tussen Etzebeth en die MRK om hom in te lig oor die klag en om ʼn verbintenis van samewerking tussen die twee partye te vestig.

“Albei partye het hul tevredenheid uitgespreek oor die beoogde proses wat voorlê en het die vergadering as konstruktief beskryf.

“Die speler het enige misdryf teenoor die MRK ontken en het aanduiding gegee van sy volle samewerking in die saak,” lui die verklaring van SA Rugby.

Die Springbokke vlieg vandag na Japan vir die Wêreldbekertoernooi.

Rassie Erasmus, Springbok-afrigter, het Donderdag tydens ʼn mediakonferensie gesê hulle het intussen nog niks verder van die polisie gehoor oor die voorval nie.

“Ek moet glo wat die speler my vertel want ons het ʼn verhouding. Ons kan slegs optree wanneer die teendeel bewys word.”

Die polisie het vroeër bevestig hy ondersoek die voorval wat Saterdagaand plaasgevind het.

“ʼn Klag van aanranding is aanhangig gemaak in verband met die voorval,” het sers. Noloyiso Rwexana, woordvoerder van die polisie, gesê.

“Daar word beweer dat ʼn argument tussen twee groepe ontstaan het. Daar is mense wat beseer is en na ʼn hospitaal geneem is behandeling.” Niemand is nog in hegtenis geneem in verband met die voorval nie.

Etzebeth het op sy Facebook-blad op die bewerings gereageer.

“Dit is heeltemal onwaar en ongegrond om te beweer dat ek iemand in Langebaan fisies of rassisties mishandel het, soos op sosiale media berig word. Verskeie getuies kan dit bevestig,” het Etzebeth gesê.

“Ek is en sal altyd daarna streef om ’n ware ambassadeur te wees vir hierdie pragtige reënboognasie en die sport wat ek liefhet.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

60 Kommentare

jongste oudste gewildste
Joey

Dis belaglik!

Christo

My vraag hoekom word Malema se uitsprake ook nie met soveel dringendheid en spoed gehanteer nie, dis om van te braak

CallieL

Wil net vra. As hy daar was, hoekom het hy dit nie gestop nie. Glo my, niemand gaan skoor soek waar daardie manne is nie. Glo liewer die fris manne het soos altyd as hulle in so groep is mos maar iets vir almal te vertel want wie kan teen hulle stry. Iemand het toe seker maar teruggepraat

Andre Coetzee

Ek stem.Ek vind dink moeilik om te glo dat enige iemand net so storie sou uitdink en Eben het ongelukkig reeds ‘n sleg naam wat vuilspel,baklei ens betref.So ek is geneig om die klaer in die geval te glo totdat daar konkrete bewyse is om die teendeel te staaf.Ongelukkig het Eben ‘n sleg rekord en dit tel teen hom.Hy moet verkieslik nie in drink plekke rondhang waar onderonsies kan uitbreek nie want sy humeur is glo haardun.

Johan Neuteman

Dis onnodig om woorde te gebruik wat aanstoot gee. Ek stem nie saam met die oordrywing van die aanstoot en wat alles nie, maar dis nou maar so dat mens dan eerder die woorde vermy en met jou lewe aangaan. Daar is gelukkig al alternatiewe woorde uitgedink, soos om die groen insek met lang pote en tentakels wat amper soos ‘n stokkie met pote en vlerke lyk, ‘n bidsprinkaan te noem.