EU dwing SA maatskappy om medisynepryse te sny

Die Europese Kommissie het Woensdag gesê hy het die Suid-Afrikaanse medikasiereus Aspen gedwing om pryse te sny op ses kankermedikasies nadat daar bevind is die maatskappy misbruik sy markdominansie.

Die maatskappy het ingestem om die pryse met sowat 73% binne die EU te sny van die medikasie wat vir die behandeling van sommige bloedkankers, insluitend leukemie, gebruik word ná die jare lange ondersoek.

“Aspen se toewyding sal Europese gesondheidsorgstelsels miljoene euros spaar en seker maak dat dié noodsaaklike medikasie beskikbaar bly,” het Margrethe Vestager, hoof van mededinging by die Europese Kommissie, gesê. “Vandag se besluit stuur ʼn sterk boodskap aan ander dominante farmaseutiese maatskappye om nie aan pryspraktyke deel te neem wat ons gesondheidsorgstelsels uitbuit nie.”

Die Europese Kommissie, die EU se uitvoerende arm, het in 2017 met ʼn ondersoek begin ná Aspen die pryse met ʼn paar honderd persent verhoog het van sommige van sy medikasies. Die saak was die Kommissie se eerste ondersoek oor bewerings van prys-uitbuitingspraktyke in die farmaseutiese bedryf.

Die Kommissie het gesê hy het “verskeie ernstige besware gevind dat Aspen se gedrag die EU se mededingingsreëls verbreek” ná “geen regmatige redes” verskaf kon word vir die maatskappy se hoë winsgrens nie.

“Aspen kon dié verhogings instel, omdat pasiënte en dokters hoofsaaklik geen alternatiewe gehad het as om dié betrokke medikasie te gebruik nie. Toe nasionale owerhede probeer het om Aspen se versoeke vir die prysverhogings teen te staan, het Aspen gedreig om die medikasie van die nasionale lys van terugbetaalbare medikasies te verwyder en was in sommige gevalle selfs gereed om die normale voorraad uit die mark te onttrek.”

Vestager het gesê die prys van die medikasie, wat deur duisende pasiënte gebruik word, insluitend jong kinders, sal nou gewysig word na die voor-2012-vlakke voor die verhogings ingestel is. Die verlaagde pryse sal vir minstens 10 jaar van krag bly en die maatskappy het homself daartoe verbind om steeds die medikasie te verskaf, het die Kommissie bygevoeg.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

11 Kommentare

jongste oudste gewildste
ElizeK

Ondersoek hulle hier ook ASSEBLIEF. Mense sonder mediese spaarplanne kan nie meer medikasie bekostig nie!!!!

Vlooitjie

Siek mense word uitgebuit om deur hul nekke te betaal sodat die firmas kan geld maak, nie net teen “, ‘n wins nie maar met meer as 100%. Dis ‘n skande!

Piet

Net nog ‘n rede hoekom ek vir die NGV is. Al hoe mens kan saam staan teen Big Pharma

Hendrik

Stem saam, hulle moet ook in Suid Afrika ondersoek word. Die pryse van medikasie is gans te hoog – onbeskosterbaar!!!

Pieter

So gaan dit orals. Gaan kyk maar wat maak hulle in Amerika met hulle eie mense. 73% is maar min as jy kyk na hulle…. Vir die wat Netflix het, gaan kyk gerus na Dirty Money Series: Episode 3 “Drug Short”.
En ja, daar is maar min wat gedoen word daaraan. En dit is nie net medikasie nie maar die hele proses. Van geboorte tot begrawe, almal wat ‘n spesialis is gooi die pryse…