Fanie du Preez gevonnis

Fanie Du Preez Woensdag in die hof. Foto: Nadine Watkins/90.6 FM Stereo Nuus

Fanie Du Preez Woensdag in die hof. Foto: Nadine Watkins/90.6 FM Stereo Nuus

Fanie du Preez (40) is Woensdag in die rondgaande hof in Vereeniging gevonnis vir die moord op sy vrou, Thea (43) en hul kinders, Carlia (17) en Phillip (14).

Du Preez het sy gesin in die vroeë oggendure van 3 Desember 2015 in hul huis in Vanderbijlpark doodgeskiet. Regter Hennie de Vos het Du Preez op 1 November skuldig bevind op drie aanklagte van moord, ʼn aanklag van dwarsboming van die gereg en ʼn aanklag van die onwettige besit van vuurwapens.

90.6 FM Stereo Nuus berig De Vos het Woensdag in sy uitspraak gesê Du Preez is ten volle verantwoordelik vir sy dade en is nie deur eksterne faktore, soos drank of emosionele trauma, beïnvloed nie. Hy sê Du Preez het egter nie verantwoordelikheid vir sy optrede aanvaar nie en sedert die moorde voortdurend probeer om die blaam op iemand anders te plaas.

Carlia, Thea en Phillip du Preez. Foto: Facebook

Carlia, Thea en Phillip du Preez. Foto: Facebook

Hy het bevind huisarres, soos Joan van Wyngaardt, Du Preez se ma, vroeër versoek het, sal nie ʼn gepaste vonnis vir die misdade wees nie. Volgens De Vos tel dit wel as versagtende omstandighede dat dit Du Preez se eerste oortreding is, maar kan die gevoelloosheid en wreedheid van die moorde nie geïgnoreer word nie. “Thea is van die reg ontneem om eendag ʼn ouma te wees. Carlia en Phillip is ontneem van liefde, hul eie kinders en ʼn toekoms,” het hy gesê.

Volgens De Vos is die kans op rehabilitasie vir Du Preez skraal, aangesien die moorde sinneloos was en heeltemal uit selfsug gepleeg is.

De Vos het Du Preez tot drie keer lewenslange tronkstraf gevonnis vir elk van die moorde, asook ʼn bykomende tien jaar tronkstraf vir dwarsboming van die gereg, sewe jaar tronkstraf vir die onwettige besit van ʼn vuurwapen en twee jaar tronkstraf vir die onwettige besit van ammunisie. Hy het gelas dat die vonnisse gelyklopend uitgedien word.

Lees alle vorige berigte oor die Vanderbijlpark-moorde op Maroela Media.

Inligting met vergunning van 90.6 FM Stereo Nuus.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

60 Kommentare

jongste oudste gewildste
HANNELIE

Die man verdien die doodstraf maar ja te minste gaan hy sit vir n lang tyd!!!

Sharon

Help my as ek nou ‘n dom vraag vra. Maar lewenslank beteken nie die res v jou lewe nie… Nie tot jy dood is nie reg? Hy kom êrens wel uit en parool word dan nie oorweeg nie?

Cherokee

Wat is die verskil tussen 3 lewenslange vonnisse plus 10 jaar en een lewenslange vonnis?
Waarom op aarde die vonnisopleggers vonnisse gelyklopend laat uitdien is onverstaanbaar.

Karoomeisie

Ek weet nie of die regters besef wat hul doen met samelopende vonnisse, want die man ga na ongeveer 18jr aanmerking kom vir parool.En reverdig dit 3 MOORDE???????? BELAGLIK!!!!!

Denise

Ek het geen simpatie met die man nie hy het drie pragtige mense vermoor en dit sy eie mense wat hom met hulle lewe vertrou het!!!