FDA beperk gebruik van J&J weens bloedklonte

Foto bloot ter illustrasie. (Foto: Unsplash)

Die Amerikaanse kos-en-medisyne-owerheid (FDA) het Donderdag gesê dat die gebruik van Johnson & Johnson se entstof teen Covid-19 vir eers as veiligheidsmaatreël in die VSA beperk word, weens ʼn moontlike verband tussen dié entstof en ʼn seldsame soort bloedklont. Dit sluit skraagdosisse van hierdie entstof in. Dit is omdat die FDA tot die gevolgtrekking gekom het dat die risiko van die entstof groter is as die voordeel daarvan, tensy pasiënte nie toegang tot ʼn ander entstof het nie.

Dié spesifieke entstof is ’n jaar gelede ook gestaak weens dieselfde rede. Teen Maart verlede jaar is 60 bevestigde gevalle van die bloedstollingsindroom aangeteken, insluitend nege waar die pasiënt gesterf het.

Daar is toe vasgestel dat daar ’n een-in-’n-miljoen-kans is om bloedklonte te kry en dat dit blyk dat vroue tussen 18 en 48 jaar oud veral die risiko loop. Die moratorium op die gebruik van die entstof is later opgehef en lande, insluitend Suid-Afrika, het voortgegaan om dit toe te dien.

The Guardian berig die FDA het weer die Johnson & Johnson-entstof se data hersien en die risiko van lewensgevaarlike bloedklonte daaraan verbonde. Hoewel die data geen nuwe insigte bied nie, was dit vir die FDA kommerwekkend dat die probleem voortduur en die organisasie het gevolglik besluit om die entstof weer te beperk, berig Washington Post.

Amptenare van die Amerikaanse sentrums vir siektebeheer en -voorkoming het reeds in Desember aanbeveel dat ander entstowwe in plaas van die Johnson & Johnson-entstof gebruik moet word. ‘n Bykomende ontleding het die FDA oorreed om groot veranderinge aan die entstof se noodgebruikmagtiging aan te bring, wat bepaal hoe die entstof gebruik kan word.

Die FDA beveel nou aan dat die entstof slegs toegedien word aan volwassenes wat nie ‘n ander entstof kan ontvang nie of spesifiek die Johnson & Johnson-entstof versoek.

Volgens CNN beveel die FDA aan dat slegs dié wat ‘n ernstige allergiese reaksie op die mRNA-entstowwe (insluitend Pfizer/BioNTech of Moderna) getoon het of persoonlike bekommernisse oor dié entstowwe het, die J&J-entstof mag kry. Diegene met beperkte toegang tot mRNA-entstowwe, moet ook die Johnson & Johnson-entstof kry.

Amerikaanse owerhede beveel maande lank reeds aan dat Amerikaners wat nog hul Covid-19-inentings wil kry, eerder die entstowwe van Pfizer of Moderna kry.

Washing Post berig Johnson & Johnson het in ‘n verklaring beklemtoon dat die bloedklonte nie ‘n nuwe risiko is nie “en weerspieël nie ‘n verandering in die koers van gevalle wat waargeneem is nie”. Die maatskappy het bygevoeg dat “data steeds ‘n gunstige voordeel-risiko-profiel vir die Johnson & Johnson-entstof by volwassenes ondersteun, in vergelyking met geen entstof nie”.

Daar is teen Donderdag meer as 18,7 miljoen dosisse van die J&J-entstof in die VSA toegedien. Van diegene wat as volledig ingeënt beskou word, het 7,7% hierdie entstof gekry. Meer as 8,5 miljoen Suid-Afrikaners is al met dié entstof ingeënt.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

12 Kommentare

jongste oudste gewildste
krodedil

Nou kom die newe effekte een vir een uit wat vir lank onken is.

Misky

En dan word ons gedreig en allerhande nonsens vertel as ons nie inwillig en soos skape in ‘n ry gaan staan nie. Die entstof is nog in vroeë stadium en nie genoeg getoets nie. Dankie vir die berig MM, ons wil sulke goed hoor en weet.

marius

En wie gaan verantwoordelikheid aanvaar ? Niemand . Selfs in hierdie hool het wetgewing wat hulself vrywaar teen enige aksies . Grootste leuen in die geskiedenis van die mensdom . Nie eers grot bewoners was so agterbaks nie .

Diline

O ja, maar die afgelope 2 jaar is mense aangepor om hierdie inentings te neem – Alle sprake van ENIGE NEWE EFFEKTE is onder die mat in gevee.

Andre

“Dit is omdat die FDA tot die gevolgtrekking gekom het dat die risiko van die entstof groter is as die voordeel daarvan, tensy pasiënte nie toegang tot ʼn ander entstof het nie”. Wel gestel!