Fietsryer steek twee ‘rowers’ met knipmes dood

Die polisie en nooddienste op die toneel. Foto: Netcare 911

Die polisie en nooddienste op die toneel. Foto: Netcare 911

Twee vermeende rowers is dood nadat hulle ʼn fietsryer naby ʼn gewilde bergfietspark in Pinetown, KwaZulu-Natal, wou beroof.

Kapt. Nqobile Gwala, polisiewoordvoerder, het Donderdag aan Maroela Media gesê die fietsryer het Sondagoggend in die omgewing van Giba Gorge fiets gery, toe hy deur twee verdagtes oorval is wat hom wou beroof.

“Die fietsryer het ʼn mes aan hom gehad waarmee hy die verdagtes gesteek het,” het Gwala gesê. ʼn 25-jarige verdagte is op die toneel dood en die tweede, wie se ouderdom onbekend is, is in ʼn kritieke toestand deur paramedici van Netcare 911 na ʼn hospitaal geneem.

Die bestuur van die park het ná die voorval ʼn beroep op fietsryers gedoen om versigtig en paraat in die omgewing te wees, veral as hulle die veiligheid van die park verlaat.

“Ons wil beklemtoon die aanval het nie in die park plaasgevind nie. Die fietsryer het oor die voetbrug aan die kant van Westmead gery en is in ʼn voetpad, wat na die grondpad lei, aangeval,” het die park in ʼn verklaring gesê.

“Die fietsryer het sy aanvallers met ʼn knipmes afgeweer. Die fietsryer ongedeerd, maar getraumatiseer.”

Volgens Chris Botha, woordvoerder van Netcare 911, moes paramedici sowat 500 m teen ʼn steil helling voetslaan om by die eerste man uit te kom. “Hy het ʼn steekwond opgedoen en was reeds dood toe hy ondersoek is,” het Botha aan Maroela Media gesê. Die tweede man is sowat 500 m verder, ook met ʼn steekwond, naby ʼn rivier aangetref. Hy moes met ʼn helikopter na die pad geneem word, vanwaar hy onder polisiebewaking met ʼn ambulans na ʼn hospitaal in Chatsworth geneem is. Die man het Sondagnag in die hospitaal aan sy beserings beswyk.

Gwala het gesê die Mariannhill-polisie doen ʼn geregtelike doodsondersoek en ondersoek ʼn saak van poging tot roof.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

42 Kommentare

jongste oudste gewildste
WACEMCEE

Gee daai ou ‘n baaik.

ck

Dit is hoogtyd dat ons fietsryers opstaan vir onsself.

Hennie

Ek ry gewoonlik ‘n klein vuur wapen in ‘n buik holster (Smart Carry) saam, maar ‘n mes sal ook werk. Sal daarvan hou om te weet watse mes dit was, en of die fietsryer opleiding gehad het met messe.

Riaan

Hoop net nie hul neem nou reg stappe teen oor hom nie

N

Hoop nie die fietsryer gaan nou van moord aangekla word nie.