Een persoon is dood en drie ernstig beseer nadat die bakkie waarin hulle gery het Dinsdagmiddag verskeie kere op die N1-deurpad naby die Grassmere-tolhek gerol het.
Derrick Banks, ʼn woordvoerder van ER24, sê die ongeluk het in die rigting van Pretoria plaasgevind. “Die bestuurder het beheer oor die voertuig verloor en dit het gerol en op sy kant tot stilstand gekom. Die bakkie se kap het oopgebreek en die passasiers wat agterin gesit het, is uit die voertuig geslinger,” het Banks gesê.
Een passasier was reeds dood toe paramedici op die toneel kom. Die ander drie is op die toneel vir nek- en rugbeserings behandel. Hulle is na ʼn nabygeleë hospitaal geneem vir verdere behandeling.