Inwoners van Orlando-Oos in Soweto het glo Woensdagaand 22 voertuie by Soweto se Eskom-depot beskadig omdat hulle nie elektrisiteit het nie.
Ao. Kay Makhubela, ʼn polisiewoordvoerder, het Donderdag gesê altesaam 15 voertuie is aan die brand gesteek, en sewe is beskadig. “Inwoners van die nabygeleë Nancefield-hostel het vermoedelik deur die aand op die depot toegeslaan,” het Makhubela gesê. “Hulle het nie elektrisiteit nie.”
ʼn Groot skare het Donderdagoggend by die kragvoorsiener se perseel saamgedrom en op elektrisiteittoevoer aangedring. “Buiten dié voorval is die betoging tot dusver vreedsaam. Die polisie hou ʼn wakende oog oor die situasie,” het hy gesê.
Niemand is nog in verband met die voorval in hegtenis geneem nie. Die polisie ondersoek die saak. – SAPA
Foto’s: @NeoMediaGuru / Twitter