Foto’s: Daar is nog werk om te doen, sê Ramaphosa

Pres. Cyril Rhamaphosa aan die woord. (Foto: Elmond Jiyane, GCIS)

“Vandag kan die kinders van ons land, swart en wit, dieselfde skole bywoon en aan dieselfde universiteite en kolleges studeer. Toe demokrasie gekom het, het ons nie in die afgrond van wraak en vergelding afgestort nie.”

Só het pres. Cyril Ramaphosa Saterdag tydens die nasionale Vryheidsdagviering by die Miki Yili-stadion in Makhanda, voorheen bekend as Grahamstad, in die Oos-Kaap gesê.

“Op hierdie Vryheidsdag het ons baie om te vier. Die belangrikste is die bevordering van ons nasie in ʼn verenigde, nierassige, nieseksistiese en demokratiese Suid-Afrika.”

Die president glo wel dat Suid-Afrika ondanks die vordering oor die afgelope 25 jaar sedert die eerste demokratiese verkiesing in 1994 steeds gekonfronteer word deur pogings om die eenheid van die land te ondermyn. Dít word gedoen deur rassisme, aanvalle op buitelanders en die openlike vertoon van die ou Suid-Afrikaanse vlag, het Ramaphosa gesê.

“Uit respek vir ons Grondwet en ter verdediging van ons vryheid verwerp ons rassisme. Ons verwerp aanvalle op diegene wat in ons land toevlug kom soek het en ons verwerp geweld. Die opofferings van ons voorouers was te groot en die prys wat hulle moes betaal te hoog,” het Ramaphosa tydens die viering gesê.

Die president het in sy toespraak erken dat Suid-Afrika baie bereik het oor die afgelope 25 jaar, maar Suid-Afrikaners tog gemaan dat die land nog baie het om te bereik.

“Ons is nog steeds ʼn baie ongelyke land. Daar is groot skeidings tussen onderskeidelik ryk en arm, stedelik en landelik, mans en vroue, diegene met werk en dié daarsonder, asook diegene wat die land besit en diegene wat daarvan weerhou word,” het hy gesê.

Pres. Cyril Rhamaphosa aan die woord. (Foto: Elmond Jiyane, GCIS)

Openbare indiensnemingsprogramme het ʼn basiese inkomste- en werkservaring en opleidingsgeleenthede vir baie werkloses verskaf. Oor die afgelope 25 jaar het die ekonomie in grootte verdubbel en die aantal mense in diens het met agt miljoen toegeneem, het Ramaphosa gesê.

“En tog, ondanks hierdie merkwaardige prestasies, leef te veel van ons mense nog steeds in armoede, te veel is werkloos of haweloos, te veel gaan sonder voorsiening in basiese behoeftes.

“Soos ons 25 jaar van demokrasie vier, moet ons al ons aandag fokus om te verseker dat alle Suid-Afrikaners ook die ekonomiese en maatskaplike voordele van vryheid kan beleef. Ons kan nie ʼn volk van vrye mense wees as so baie van ons nog in nood leef nie – as so baie leef sonder genoeg kos, behoorlike skuiling, gesondheidsorg van gehalte of ʼn manier om ʼn inkomste te verdien. Ons kan nie ʼn volk van vrye mense wees as geld wat vir armes bedoel is, vermors, verlore of gesteel word nie,” het Ramaphosa gesê.

“En daarom betree ons die volgende 25 jaar van vryheid met ʼn hernieude vasberadenheid om alle Suid-Afrikaners die belofte van die demokratiese deurbraak van 1994 te laat beleef.”

Suid-Afrikaners sal oor sowat tien dae weereens in toue staan om op 8 Mei hulle stem te plaas tydens die 2019- nasionale verkiesing.

“Ons elkeen het ʼn rol om Suid-Afrika beter te maak – as beter broers, susters, mans, vroue, kinders, klasmaats, medewerkers, bure en as burgers. Op hierdie Vryheidsdag moet ons dus besluit om saam te werk om dié uitdagings aan te pak,” het die president gesê.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

61 Kommentare

jongste oudste gewildste
Andreas

Ek haal hom aan: “Toe demokrasie gekom het, het ons nie in die afgrond van wraak en vergelding afgestort nie.”

Skuus? SEB en ander wetgewing, grondonteiening? Vra hierdie padda wat in stadig kokende water sit en tik.

Hannetjie

Daar kon reeds baie meer gedoen gewees vir die landsburgers wat nie basiese dienste soos beter behuising,water,riolering en elektrisiteit steeds nie het nie.Die rede is wel so bekend…ipv die regering toegesien het dat die verkose amptenare hul werk wel kon doen…was meerderheid besig om hulself te verryk.Kry al die geld terug wat jare en jare onregmatig “verdien’ is…en spring aan die werk.

vincent

THANK GOD I’M NOT PART OF THE NEW SOUTH AFRICA ANYMORE! A government that have achieved ZERO in 25 years and is hopelessly incompetent to lead its nation. I hope Cyril donate some of his millions to the poor and lead by his actions. Typical politician…”all talk and no action”

JA

Ek sal my vlag waai waar ek wil. Dit het niks met enigiemand anders te doen nie.

Andreas

Die aantal mense in diens, sê hy, het die afgelope 25 jaar met 8 miljoen toegeneem en die ekonomie het verdubbel, maar nog steeds verkwalik hulle apartheid en die vorige bedeling vir die erge werkloosheid, nog steeds straf hulle die wit mense met SEB, eintlik die jeug, want die grootmense sit by die huis.