[Foto’s] Dapper hond baklei verbete teen inbrekers

Foto: Facebook.

Lara, ʼn sewejarige pit bull-teef van Pretoria, het Donderdagmiddag vir lewe en dood geveg teen inbrekers wat haar met messe en skroewedraaiers aangeval het.

Jean du Venhage, Lara se eienaar, het aan Maroela Media vertel Lara is slegs vyf dae voor dié aanval gif ingegee by sy huis in Booysens. “Ons dink dit was dieselfde aanvallers wat al die hindernisse uit die pad wou kry om by die huis in te breek. Hulle het die huis dopgehou. Normaalweg is heelwat bure so teen 12:00 se kant tuis, maar dié keer was daar nie een nie,” het Du Venhage gesê.

Du Venhage het gesê hy vermoed die boosdoeners het gedink Lara is dood toe hulle die erf binnegekom het.

Du Venhage se vrou en sewejarige dogtertjie het die middag op Lara afgekom waar sy lam van skok in ʼn plas bloed buite die huis gelê het. Hulle het hom onmiddellik gebel en hy het hom huis toe gehaas. By sy aankoms het hy sy vrou en dogter langs die bebloede Lara aangetref.

“Sy het in haar hok gelê en slaap en op [die inbrekers] afgestorm toe hulle by die voordeur kom. Sy wou ons huis en haar yorkie-maatjie, Lilly, beskerm. Ek dink sy het een van die mans aan sy arm beetgekry en hy het haar herhaaldelik met sy ander hand met ʼn mes gesteek,” het Du Venhage vertel.

Volgens hom het Lara talle skroewedraaier- en meswonde aan haar gesig, bors en voorpote opgedoen.

“Die swelling begin nou al sak, dit gaan beter met haar. Ek maak al haar kos sag omdat dit vir haar nog ʼn bietjie moeilik is om te eet. Een van haar slagtande is ook weg, ek vermoed dis in die aanvaller se arm.”

Du Venhage vertel die aanvallers het bo-oor ʼn “sesvoetmuur met omtrent twee voet lemmetjiesdraad bo-op” gevlug. Daar kan ook bloed aan die muur gesien word.

ʼn Saak van poging tot huisroof en dieremishandeling is by die polisie aanhanging gemaak. Volgens Du Venage het die forensiese span eers Vrydagoggend ná ʼn reënbui by hul huis opgedaag.

Du Venhage sê hy hoop dié storie laat mense ʼn bietjie anders dink oor pit bulls.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

89 Kommentare

jongste oudste gewildste
Helene

Vergewe my maar ek het ‘n haat in my vir die gemors wat geen respek het vir mens- en dierelewe nie. Wanneer gaan almal wat vrede in die land wil hê, begin saamstaan en sê “Genoeg is genoeg”. !!!

Mads

Jy is ‘n dapper meisiekind en ek hoop jy word gou gesond!!!!

Sue

Wat ‘n dapper hond!! Bly sys okay

Afrikaner

Gee daai hond n helse groot sagte steak!!!!!!!!

Teresa

Mooi so Lara, jy het ‘n goeie job gedoen. Ek glo jou huismense gaan jou met ‘n stewige steak beloon. Hoop jy is sommer gou gesond.