[Foto’s] Drie vas vir ses wilde diere in motor

Die diere wat in die motor was (Foto: Verskaf)

WAARSKUWING: Die foto’s in die berig mag kinders of sensitiewe lesers ontstel.

Drie mans van die Oos-Kaap staan tereg op aanklagte van onwettige jag en die besit van bedreigde wild nadat hulle Saterdagoggend met nagenoeg ses wilde diere in ʼn Toyota Corolla vasgetrek is.

Volgens Kapt. Mali Govender, woordvoerder van die polisie, is die verdagtes deur die Port Alfred K9-ondersoekeenheid van die pad afgetrek nadat hulle die spoedgrens oorskry het.

Die bestuurder het gesê hy is laat vir werk, en het daarom vinnig gery.

Govender het gesê ʼn lid van die K9-ondersoekeenheid, Tertius Neethling, het egter aan die polisie gesê hy het met nadere ondersoek die karkasse van twee bosbokke, een grys duiker, ʼn ystervark en ook ʼn lewende hond in die motor opgespoor.

Vreemde stampgeluide in die kattebak het hom ook gelei na ʼn lewende duiker en ʼn dooie springhaas.

Neethling het gesê die diere is vermoedelik met die bebloede spiese en messe wat in die motor opgespoor is, doodgemaak.

Volgens die polisie het dié diere ʼn geraamde waarde van net onder R20 000.

Die bestuurder het verder ook twee waarskuwings ontvang vir die vervoer van ʼn hond in ʼn kattebak en omdat hulle die duiker laat ly het.

Die drie mans sal na verwagting vandeesweek aangekla word en in die hof verskyn.