Foto’s: Honderde voertuie vernietig toe weermagbasis brand

Honderde voertuie is Donderdagaand by ’n weermagbasis in Pretoria vernietig. (Foto: Tarien Cooks)

Honderde voertuie is Donderdagaand vernietig toe ’n weermagperseel in Pretoria in vlamme opgegaan het. Dié perseel is in Wallmannsthal, noord van die roosplaas Ludwig’s Roses, geleë.

Die presiese oorsaak van die brand is nie in dié stadium bekend nie, maar dit wil voorkom of ’n veldbrand ontstaan en na die weermagperseel versprei het.

“Dit was ’n geweldige brand. Die wind was ook uiters sterk, wat dit haas onmoontlik gemaak het om teen die vlamme te baklei,” sê Johan Botha, voorsitter van die Sinoville-brandbestrydingsvereniging (SBBV).

Volgens Botha is die SBBV omstreeks 19:20 na die toneel ontbied, waar honderde weermagvoertuie reeds by hul aankoms in ligte laaie was.

 Minstens 70% van dié voertuie was glo teen 20:30 heeltemal uitgebrand.

Honderde voertuie is Donderdagaand by ’n weermagbasis in Pretoria vernietig. (Foto: Tarien Cooks)

Botha sê die voertuie het “baie naby mekaar tussen lang gras” gestaan. Dit wil ook voorkom of geen brandbane in plek gestel was nie.

Hoewel die oorsaak en omvang van die skade eers later bepaal sal word, blyk dit dat meer as 500 weermagvoertuie, waaronder motors, bakkies en vurkhysers, in die brand vernietig is.

Botha sê hy sal die perseel Vrydagmiddag weer besoek om sy brandverslag te voltooi.

Die SBBV het in samewerking met die Apiesrivier-brandbestrydingsvereniging (-BBV) ongeveer vier ure gespook om die brand geblus te kry.

“Die weermag gebruik gewoonlik hul eie hulpbronne as so iets gebeur, maar dit lyk of hul toerusting dalk nie gewerk het nie. Die Tshwane-brandweerdiens het ook later kom help om die brand te blus,” sê Tarien Cooks, ’n lid van die Apiesrivier-BBV.

Honderde voertuie is Donderdagaand by ’n weermagbasis in Pretoria vernietig. (Foto: Tarien Cooks)

Volgens Cooks het die rook Vrydagoggend nog dig oor die perseel gehang, maar alles is in dié stadium onder beheer.

Cooks meen indien die voertuie op grond en nie tussen lang, ongesnyde gras gestaan het nie, sou dit nooit aan die brand geslaan het nie.

“Dit is duidelik dat daar nie voldoende voorsorg getref is nie en dat die perseel nie behoorlik in stand gehou word nie.”

Volgens Cooks het die brand gelukkig nie na omliggende eiendomme versprei nie.

Sy sê voorts dis nie die eerste keer dat so iets gebeur nie.

Meer as ’n 100 voertuie is in 2015 vernietig toe die perseel ook weens ’n wegholveldbrand vlamgevat het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

54 Kommentare

jongste oudste gewildste
Swerwer

En? Iets is beslis nie pluis nie, veldbrand of nie.

Werner

As ons nie na onsself kan omsien nie is dit verby.Maak maar reg want met hierdie niks werd regering sal die anargie wat besig is om die land oor te neem .Buite beheer spiraal want die weermag kan nie eers n vuur baklei nie.

Chris dupreez

Patetiese klomp.

miavos

Sou iemand ‘n lys kan maak van die bates en laste van Suid-Afrika? Presies hoe gesond is die ekonomie? Hoe paraat is ons? Hoe gesond is gemeenskapsdienste? Ens.? ‘n Eerlike ontleding sal op prys gestel word!

Hennie

Hoe moeilik is dit om jou weermag perseel te be veilig teen ‘n brand? Baie maklik, maar oë weë, verstand is daar nie!