Foto’s: Ingryping kom in Ottosdal ná geweld

Foto: Verskaf

Die Noordwes-regering het ingrypings in die Tswaing-munisipaliteit, wat Ottosdal, Sannieshof en Delareyville bedien, aangekondig ná geweld en oproer in die gebied die afgelope week.

Mothibedi Kegakilwe, LUR vir samewerkende regering, menslike nedersettings en tradisionele sake, sal Vrydag Ottosdal besoek.

Woedende lede van die gemeenskap het Woensdag die dorp tot stilstand gebring nadat hulle paaie met bande wat aan die brand gesteek is en ander voorwerpe versper het. Skole en ondernemings is gesluit en die R507 en R503 is geraak met betogers wat klippe na motors gegooi het.

Die munisipale gebou, twee vragmotors en ʼn trekker is ook tydens die geweld aan die brand gesteek. ʼn Polisievoertuig is beskadig toe dit met klippe bestook is toe betogers die landdroshof probeer teiken het.

Volgens kapt. Sam Tselanyane, woordvoerder van die polisie, is nege verdagtes ná Woensdag se geweld in hegtenis geneem. Die verdagtes het Donderdag vlugtig in die rondgaande hof in Ottosdal verskyn op aanklagte van openbare geweld en brandstigting. Hulle bly in aanhouding tot hul volgende verskyning op 16 Julie.

Foto: Verskaf

Die geweld het Donderdag voortgeduur en volgens Tselanyane is ʼn verdere vyf verdagtes in hegtenis geneem nadat die Lestopa-gemeenskapsbiblioteek aan die brand gesteek en polisievoertuie onder meer met petrolbomme bestook is. Die verdagtes sal Maandag in die Coligny-landdroshof verskyn op aanklagte van openbare geweld en saakbeskadiging.

Volgens die betogers het hulle reeds ʼn maand gelede ʼn memorandum aan die burgemeester oorhandig, maar voel hulle hul griewe het nog nie aandag geniet nie. Munisipale werkers daag ook tans nie vir werk op nie weens die nie-betaling van hul Junie-salarisse.

Volgens Kegakilwe het die munisipaliteit aangedui dat hulle daarin geslaag het om genoeg geld in te samel om die uitstaande salarisse te kan betaal.

Fanie du Toit, VF Plus-LP en onderleier in Noordwes, het vroeër gesê die chaos in die Tswaing-munisipaliteit het nou totaal handuit geruk.

Foto: Verskaf

“Inwoners van hierdie dorpe gaan reeds jare gebuk onder swak dienslewering, maar dienslewering het nou heeltemal tot stilstand geknars.

Dit is weer eens die plaaslike ekonomie en getroue belastingbetalers wat die meeste hieronder ly. Dit is ʼn skande dat ʼn eens florerende en vreedsame plattelandse gemeenskap effektief as gyselaar aangehou word deur omstandighede wat geskep is deur ʼn onbevoegde plaaslike ANC-regering.”

Die DA het politieke faksies en wanbestuur die skuld gegee vir die situasie in Ottosdal. “Dit het verder onder ons aandag gekom dat die munisipale bestuurder, Isaac Moruti, siekverlof geneem het ná ʼn uitval met die burgemeester, Lydia Malwane. Ons kan nie langer toekyk hoe die faksies binne die ANC swak dienslewering bewerkstellig nie,” het Freddy Sonakile, die DA in Noordwes se woordvoerder vir samewerkende regering, gesê.

Die portefeuljekomitee oor samewerkende regering en tradisionele sake het gevra vir kalmte en ʼn kriminele ondersoek na die voorvalle van geweld gelas. “Vandalisme sal nie gekondoneer of verdra word nie aangesien die herbou van die infrastruktuur miljoene rande gaan kos. Geld moet bestee word waar dit die nodigste is en nie om op te bou wat doelbewus vernietig is nie,” het Faith Muthambi, voorsitter van die komitee, gesê.

Die ANC-koukus in Noordwes het ʼn beroep gedoen op betogers en munisipale werkers om Kegakilwe die geleentheid te gee om hul kwessies en ander diensleweringsaangeleenthede op te los.

“Die LUR vir samewerkende regering het sedert sy onlangse aanstelling deur die provinsie gereis om verskeie probleme wat ons munisipaliteite in die gesig staar, op te los.

“Die ANC-koukus moedig ons gemeenskappe aan om ruimte te gee vir hierdie ingryping in die belang van stabiele dienslewering,” het Tshiamo Tsotetsi, woordvoerder, gesê.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

34 Kommentare

jongste oudste gewildste
Hennie

HAHA…. brand SA brand

Martie

Skiestog maar het julle nie die kruisie gemaak nie? Julle het mos geweet wat gaan gebeur want dit gaan al jare so. Maar NOU is julle kwaad?

Johan

Die meeste betogers lewer op geen manier ‘n finansiële bydrae tot munisipale dienste nie. Maar hulle stel voortdurend toenemende eise. Hulle sal nie ophou nie. Dit is Sielkundiges se droom van gevallestudies.

Hartseer

Wag tot hulle saamstaan in die land en elke dorp begin brand dan is ons eers in ons maai in

Phillip

Lekker brand af dan is daar geen dienste nie dit gaan lekker in die branddende SA van ons sal hier stop anders brand ek my vingers