Die ongelukstoneel. Foto’s: Netcare 911
Twee mense is dood en talle, waaronder kinders, is beseer nadat ʼn minibustaxi Donderdagoggend in KwaZulu-Natal teen ʼn wal afgerol het.
Santi Steinmann, ʼn woordvoerder van Netcare 911, het gesê die ongeluk het op die R67 tussen Ixopo en Richmond plaasgevind.
“Nooddienswerkers moes teen die styl wal afklim om by die taxi se wrak uit te kom,” het Steinmann gesê. “ʼn Man was in die voertuig vasgekeer en moes uit die wrak gesny word.”
Twee mense is dood en 17 het matige tot ernstige beserings opgedoen. Die beseerdes is op die toneel behandel, waarna hulle na ʼn nabygeleë hospitaal geneem is.
Die oorsaak van die ongeluk is nog nie bekend nie.
