ʼn Man is dood toe ʼn brand in ʼn verfwinkel in Durban uitgebreek het.
Netcare 911 het Donderdagmiddag gereageer nadat dié ambulansdiens ʼn noodoproep ontvang het omtrent ʼn brand in ʼn gebou aan die Noordkus-pad in Durban.
“Inligting van die toneel dui daarop dat die vuur in ʼn verfwinkel ontstaan het. Die munisipale reddingsdienste, metropolisie, die polisie en ʼn plaaslike veiligheidsmaatskappy was reeds op die toneel toe paramedici daar aankom,” het Shawn Herbst, woordvoerder van Netcare911 in ʼn verklaring gesê.
Nooddienspersoneel het ʼn volwasse man op die vloer van die winkel aangetref. “Paramedici van Netcare911 het hom op die toneel dood verklaar,” het Herbst gesê.
Die omstandighede rondom die voorval sal deur die betrokke wetstoepassingsowerhede ondersoek word.