Die eerste behoorlike sneeu vir die jaar het dele van die Oos-Kaap, KwaZulu-Natal en Lesotho oornag in ʼn prentjiemooi-landskap omtower.
Sneeu het Dinsdagoggend in dele van Lesotho, die suidelike Drakensberg van KwaZulu-Natal en die noordoostelike gebiede in die Oos-Kaap begin uitsak. Dit het uiterse koue vir ander provinsies soos Limpopo, Mpumalanga, Gauteng en die Vrystaat tot gevolg gehad.
Die AfriSki-oord by die Maluti-berge en die Tiffindell-oord digby Rhodes in die Oos-Kaap was sedert Dinsdagoggend onder ’n sneeukombers toegevou, nadat sneeu deur die loop van die nag hier geval het.
Sneeu het ook in Maclear en Barkly-Oos in die Oos-Kaap voorgekom.
Die Moteng-pas in Lesotho was teen Dinsdagoggend vir verkeer gesluit, weens swaar sneeu wat motoriste verhoed het om in die omgewing te ry. Dié pas was teen die middag egter vir 4×4-voertuie oopgestel. Motoriste is egter gewaarsku om versigtig te wees omdat die pad baie glad is.
’n Inwoner van Khohlo-Ntso in Lesotho het ’n foto met Snow Report SA gedeel, wat wys dat sowat 7 cm sneeu in dié gebied geval het.
ECR Traffic het op hul Twitterblad gewaarsku dat die Kingscote Cutting-pas op die R617 tussen Swartberg en Underberg in KwaZulu-Natal vir motoriste gesluit is, omdat sneeu hier tot 10 cm dik lê.
Die Sani-pas is ook deur swaar sneeu getref.
Dit lyk so mooi (alhoewel seker vrieskoud)
Brrrr…………
As die winterkombers al soe vroeg kom, kan ons aanneem die gaan ‘n BAIE KOUE 4 tot 5 maande wees wat voorle?
Wonderlik !
Prentjie-mooi!!!!
Ek dink die Kanadese en soortgelykes lag in hulle mou vir ons idees – hierdie is nie sneeu vir hulle nie, eeerder “oversize” ryp.