ʼn Gedeelte van ArcelorMittal Suid-Afrika (Amsa) se aanleg in Vanderbijlpark is Woensdagaand in ʼn ontploffing beskadig.
Tracey Peterson, woordvoerder van Amsa, het aan Maroela Media bevestig ʼn ongebruikte gaspypleiding het omstreeks 20:00 ontplof. Dit het skade aan ongeveer 15 m van die aanleg se pypleiding aangerig, asook aan aangrensende geboue en pypstrukture.
Dit is nie bekend wat die ontploffing veroorsaak het nie.
Volgens Peterson is niemand gedurende die ontploffing beseer nie aangesien die aanleg tans instandhoudingswerk ondergaan weens die algehele landwye afsondering om die verspreiding van Covid-19 te bekamp.
Herstelwerk aan die beskadigde pypleiding is reeds onderweg en bedrywighede sal na verwagting soos beplan kan voortgaan sodra die afsondering gelig is.