Foto’s: Oproepe om hulp uit KZN; dodetal styg steeds

Soek- en reddingsoperasies duur voort en grootskaalse opruimingswerk lê voor na die afgelope week se oorstromings in KwaZulu-Natal. (Foto’s; SA Police Service via Twitter)

Die dodetal in KwaZulu-Natal, wat Maandag deur ʼn woeste storm getref is, staan nou op 51.

Lennox Mabaso, woordvoerder van die provinsie se departement van samewerkende regering, het gesê die getal kan deur die loop van die dag selfs verder styg. “Een van die grootste knelpunte op dié stadium is om vermiste mense op te spoor,” het Mabaso gesê.

Nooddienswerkers, polisielede, paramedici en noodlenigingsgroepe werk sedert Maandag onophoudelik om verligting te bring. Paaie is oorstroom, die verkeer is erg ontwrig, talle ongelukke is aangemeld en verskeie skole en sakeondernemings is gesluit ná die storm die streek Maandagaand getref het. Chatsworth, Malvern en Umlazi is besonder swaar getref.

Honderde mense se huise is in modderstortings verwoes. Hulle skuil onder meer in tydelike noodverligtingstente wat die provinsiale rampbestuurseenheid sedertdien opgerig het. Ander sal tydelik in gemeenskapsale gehuisves word.

Die provinsiale regering het gevra vir skenkings om die ontworteldes te help. Mense benodig kos, klere, komberse en sanitêre items. Mabaso het gesê weldoeners het reeds begin help, maar nóg skenkings is broodnodig. Veral diegene wat geliefdes moet begrawe, het nou ekstra hulp nodig.

Pres. Cyril Ramaphosa het intussen ook in KwaZulu-Natal aangekom, waar hy en ʼn hoëvlakafvaardiging sélf na die skade gaan kyk. “Ons gedagtes is by die gemeenskappe in KwaZulu-Natal en die Oos-Kaap wat geraak word. Ek doen ʼn beroep op diegene wat daar woon om in dié tyd selfs meer versigtig te wees,” het Ramaphosa vroeër in ʼn twiet gesê.

Die president sou na verwagting vanoggend onder meer eThekwini se rampbestuursentrum besoek, sowel as gebiede soos Amanzimtoti, Umlazi, Burlington in Chatsworth en Tshelimnyama in Mariannhill.

Die Alfred Nzo-distriksmunisipaliteit in die Oos-Kaap het sedertdien ook ʼn beroep op mense gedoen om kalm en waaksaam te wees ná die deurdringende reën wat teen vanoggend minstens twee lewens in die provinsie geëis het. Een van die slagoffers is ʼn 12-jarige meisie wat verdrink het. Vloedwater het haar meegesleur toe sy ʼn oorstroomde brug by Lubhacweni, naby KwaBhaca (vantevore Mount Frere), probeer oorsteek het.

Die ander slagoffer is ʼn 39-jarige vrou wie se liggaam naby ʼn rivier by Labane in Mbizane gevind is.

Die reën het reeds verskeie brûe weggespoel. Talle ander is oorstroom, maar tot dusver nog ongeskonde. Verskeie paaie in landelike gebiede is boonop onbegaanbaar.

Sixolile Mehlomakhulu, burgemeester van die munisipaliteit, het sy simpatie met die twee slagoffers se families betuig.

“Ons doen ʼn beroep op inwoners om ten alle tye kalm en waaksaam te wees. Diegene wat in laagliggende gebiede woon, moet watervlakke dophou en na veilige plekke skuif,” het Mehlomakhulu gesê.

Die munisipaliteit het mense ook gemaan om nie brûe te probeer oorsteek wat toe is onder water nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
Henry

En so sal dit wees soos in die dae van Noag in die laaste dae.

Jr

Hierdie tipe rampe moet ons veggende politieke partye laat besef dat dit nie ons gewone mense in die straat wat die haat spoeg teenoor ander mense maar dat ons ander wat dit nodig het te wil help. Dis hulle wat die haat aanspoor.

Judge Dredd

Nou kan ons die storm die skuld gee in pleks van swak stad/infrastruktuur beplanning/instandhouding.

Pensioenaris

Vra hulp van Zim/Mozambiek, ons was vinnig om hulle te help.

Ella

Die natuur leer ons keer op keer om met respek daaraan te dink as ons beplan en ontwikkel en bou maar leer ons?
Nee en daaroor trek ons elke keer aan die kortste end as súlke reen val.
Die vloedlyne en boubeperkings word nie eens deur munisipaliteite erken en toegepas nie.
Jammer vir al die skade. Ek hoop almal leer iets daaruit.