Foto’s: Optog in België teen plaasmoorde

Die optog teen plaasmoorde in Gent, België. Foto: Facebook

ʼn Optog teen plaasmoorde in Suid-Afrika is Donderdagaand in Gent in België gehou.

Dr. Pieter Groenewald, leier van die VF Plus, is tans in België, waar hy plaasaanvalle en onteiening sonder vergoeding met verskeie mense en groepe bespreek. Groenewald het foto’s van die optog op Facebook gedeel.

Groenewald het reeds die Vlaamse Belang Jeugaksie in Gent toegespreek oor plaasmoorde en sal vergrype teen minderhede ook met ander belanghebbendes bespreek. Hy het ook met Gerolf Annemans, LP van die Europese Parlement, vergader oor onteiening sonder vergoeding.

Die optog teen plaasmoorde in Gent, België. Foto: Facebook

Groenewald sal verder die organisasie UNPO (Unrepresented Nations & Peoples Organization) toespreek oor die ANC-regering se voorneme van onteiening sonder vergoeding. Die geleentheid is tydens die 26ste presidensie-vergadering van UNPO wat plaasvind op 23 en 24 Maart.

Volgens die VF Plus vorm dit deel van ʼn deurlopende aksie van die party om die internasionale gemeenskap oor vergrype in Suid-Afrika in te lig. “Dit is in besonder ook deel van die VF Plus se aksieplan wat aan die begin van vandeesmaand bekend gestel is om die regering se planne om die Grondwet te wysig om onteiening sonder vergoeding moontlik te maak, stop te sit.”

Ingevolge dié aksieplan het die party onderneem om onteiening sonder vergoeding te internasionaliseer deur aktiewe skakeling met die Europese parlement en regerings, die Verenigde Nasies (VN) en deur die VF Plus se lidmaatskap van UNPO.

Die optog teen plaasmoorde in Gent, België. Foto: Facebook

Suid-Afrika is ʼn ondertekenaar van die VN se Verklaring oor Menseregte en volgens die VF Plus is onteiening sonder vergoeding ʼn oortreding van artikel 17 van hierdie verklaring. “Die VF Plus sal dit onder die wêreld se aandag bring.”

Die optog teen plaasmoorde in Gent, België. Foto: Facebook

Dr. Groenewald het in Junie verlede jaar UNPO se dertiende algemene vergadering in die Skotse parlement in Edinburgh oor selfbeskikking toegespreek en het gesê selfbeskikking is ʼn internasionaal erkende en aanvaarde beginsel wat aan minderheidsgroepe die reg verleen om hulself teen assimilasie en gevolglike verdwyning in ʼn meerderheid te beskerm.

Hy het gesê selfbeskikking word verskans in die Verenigde Nasies (VN) se Handves en die Internasionale Deklarasie op Burgerlike en Politieke Regte as ʼn reg van “alle mense”.

Dr. Groenewald se besoek kom nadat die Nieuw-Vlaamse Alliantie (N-VA) ook ʼn seminaar by die Belgiese parlement in Brussel gehou het oor plaasmoorde én die ANC se beleid van eiendomsonteiening sonder vergoeding.

Die N-VA is die grootste party in Vlaandere en deel van die Belgiese koalisieregering. Die byeenkoms is ingelei deur Mark Andries, die stafhoof van die Vlaamse streekpremier, Geert Bourgeois.

Die N-VA-gasheer en N-VA-parlementslid, Peter Luykx, het die byeenkoms soos volg afgesluit: “Die plaasmoorde in Suid-Afrika is een beklemmende problematiek wat nog veel te onderbelig word in die media en beleidskringe.”

Hy meen dit is belangrik dat ʼn regerende party in Europa hom hieroor uitspreek. Daar word verwag dat hierdie tema voortaan meer aandag sal kry in Vlaandere én ander lande in Europa.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

61 Kommentare

jongste oudste gewildste
braaier

Pragtig en dankie,
Selfbeskikking met baie hoë grense. Dit sal werk vir ons.

Charlie

Dankie

Gerrit

Dankie VF+ vir die bewusmaking van die genocide teen wit boere in sa ons sal onthou wie ons gehelp het waneer ons volgende jaar stembusse toe gaan

ekke

Dankie!!!

Theresa

Dankie!!! Daar is dus nog mense wat hul uiterste bes doen (en ‘n ruk terug al begin het) om ons nood na die buiteland te verkondig en oplossings te probeer vind!
Baie dankie – hou ons asb op hoogte hoe mens kan saamwerk om ‘n groot golf van krag tot krag te laat klim.