Foto’s: Seun glo deur veiligheidswag aangerand

Beserings wat die seun tydens die beweerde aanranding opgedoen het. Foto: Verskaf

ʼn Tienerseun van Lephalale (Ellisras) moes Donderdagnag in die hospitaal deurbring nadat hy glo by ʼn kettingwinkel van ʼn plaaslike winkelsentrum erg deur ʼn veiligheidsbeampte aangerand is.

Die seun se pa, wie se naam nie genoem mag word nie om die 16-jarige seun se identiteit te beskerm, het Vrydag aan Maroela Media gesê die seun is daarvan beskuldig dat hy Maandag ʼn geheuestokkie by die kettingwinkel gesteel het.

“My seun het gister [Donderdag] omstreeks 10:00 in die parkeergebied van die winkelsentrum geloop toe ʼn vrou wat in die kettingwinkel werk hom gesien het. Sy het ʼn veiligheidswag wat by die sentrum werk, geroep en hulle het my seun in die winkel ingesleep, die deure gesluit en hom in ʼn kamertjie toegesluit,” het die pa gesê.

Die veiligheidswag het die seun glo herhaaldelik “pimpel en pers” met sy knuppel en die plat hand geslaan. Die pa het foto’s van die beserings geneem en aan die media verskaf.

“My seun het in ʼn stadium die knuppel uit die wag se hande gegryp en in die hoek gegooi. Die wag het hom gedwing om op die vloer te gaan lê en gedreig om hom te skiet as hy beweeg. My seun was so bang hy het nie gekyk of die man ʼn vuurwapen by hom gehad het nie.”

ʼn Werker by die winkel het intussen die polisie ontbied, waarna die polisie die seun in hegtenis geneem, geboei en agter in ʼn vangwa gesit het. Die polisie het sy ouers omstreeks 10:20 in kennis gestel dat hy in hegtenis geneem is op aanklag van diefstal. Toe hulle verneem van die beweerde aanranding het hulle daarop aangedring om hom na ʼn hospitaal te neem, waar hy opgeneem is vir waarneming.

“As alles goed gaan, sal hy hopelik vandag [Vrydag] ontslaan word. Ons wag nog net vir uitslae of sy niere reg funksioneer.”

Die ouers het ʼn klag van aanranding met die doel om ernstig te beseer teen die veiligheidswag aanhangig gemaak en het reeds ʼn saaknommer. Niemand is nog in verband met die voorval in hegtenis geneem nie. Die ouers oorweeg ook om siviele stappe teen sekere partye te doen.

ʼn Saak van diefstal is teen die seun aanhangig gemaak. Maroela Media het navraag by die polisie gedoen en wag nog vir terugvoer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

71 Kommentare

jongste oudste gewildste
Gys

Plaas asb die naam van die ketting winkel wat sulke gedrag toelaat sodat ek en my gesin nooit ons voete weer daar sal sit nie dit is afskuwelik wat met die kind gebeur het.

Von

Die hemel weet ek sou dit verloor het!!!!
Wat gaan met die mensdom aan . . . hulle word soos diere !!!!!!

Hester

Ja noem die kettingwinkel se naam. Gaan daar n saak van aanrading teen die wag gemaak word. n Wag mag geensins sy hande lig vir enige beskluldigde minderjarige of nie. Ek sal amok maak vir daai wag , die winkel asook enige iemand anders.

Lynette

A nee a. Diefstal , as dit was, is verkeerd, maar dit wat hier gebeur het was onnodig. Beweerde aanranding? Dit lyk vir my na byna doodgeslaan vir n memorystick? Total buitensporige optrede. Ek hoop die veiligheidwag verloor ten minste sy week. Hy behoort aangekla te word vir poging tot Moore. Sterkte aan die gesin.

Bruno Stef

Wat van 14 Jaar tronkstraf met aanklagtes van “Poging tot moord” Aanranding met n gevaarlike wapen / Ontvoering en onwettige aanhouding plus hospitalisering/dokters onkoste of is dit maar net wensdenkery van my kant af.