[Foto’s] Trok vat vlam by vulstasie

ʼn Vragmotor het Vrydagoggend by ʼn vulstasie langs die N3 buite Harrismith aan die brand geslaan.

Athlenda Mathe, woordvoerder van Netcare 911, het gesê ʼn petroljoggie was by die Tugela Truck Inn besig om die vragmotor vol brandstof te maak toe dit skielik vlamgevat het. Die joggie en die vragmotorbestuurder kon daarin slaag om betyds van die brandende vragmotor weg te kom en is ongedeerd.

“Die plaaslike brandweer en die N3 Toll Concession-brandweerdiens is ontbied en kon daarin slaag om die vuur te blus,” het Mathe gesê. Polisiebeamptes was ook op die toneel.