Foto’s: Twee bejaardes vermis ná vloed by Klein-Kariba

Anne Ferreira het die foto geneem van die gebied waar Klein Kariba se buite swembad is.

Anne Ferreira het die foto geneem van die gebied waar Klein Kariba se buiteswembad is.

Lees ook ons opvolgberig:
Klein-Kariba-vloed: Bejaarde se liggaam gevind
Klein-Kariba: Vrou steeds vermis; oord gesluit met miljoene rand se skade

Twee bejaardes van Bela-Bela word vermis nadat ʼn kitsvloed Vrydagmiddag die ATKV Klein-Kariba-vakansieoord in Limpopo getref het.

Die bejaardes, wie se name nog nie bekend is nie, was teen Saterdagmiddag steeds vermis, het een van die oord se bestuurders, Elza-Lee Pretorius, aan Maroela Media bevestig. Die twee bejaardes was dagbesoekers van Bela-Bela.

Dr. Wim de Wet, die hoofbestuurder van die oord, het Vrydagaand ʼn verklaring uitgereik waarin hy gesê het swaar reënval sedert Donderdag het ‘n bogemiddelde vloei van water deur die oord tot gevolg gehad. Nagenoeg 150mm reënval is gemeet.

“Vrydag net ná 13:00 het ons ʼn berig ontvang dat ʼn damwal by ‘n oord aan die bokant van Klein-Kariba gebreek het. Binne sekondes het ‘n watermassa die oord getref en is die restaurant, winkel en binneswembad oorstroom. Kleiner geboue en strukture is saam met voertuie wat by die winkel geparkeer was, meegesleur,” het De Wet gesê.

Verskeie voertuie het stroomaf teen bome vasgespoel en een voertuig is tot teen die damwal by die gholfbaan meegesleur.

Van die voertuie wat deur die vloed meegesleur is. Foto: Kenneth Linton / Twitter

Van die voertuie wat deur die vloed meegesleur is. Foto: Kenneth Linton / Twitter

“Personeel het dadelik twee noodstasies ingerig, aangesien die oord deur die vloedwater in twee dele verdeel is. Stappe is dadelik geneem om gaste op te spoor en om hul veiligheid te verseker deur hulle na hoogliggende berghuise te neem. Elektrisiteit en watertoevoer is nie in dié gebiede ontwrig nie.”

De Wet het gesê spanne van die polisie, rampbestuur en nooddienste was baie vinnig op die toneel en het professioneel en effektief bygedra tot die hantering van die situasie.

Foto: @risies / Twitter

Foto: @risies / Twitter

“Gaste wat vir die naweek oppad Klein-Kariba toe was, is geskakel om hulle van die situasie in te lig en hul besprekings te kanselleer. Verskeie gaste moes ook by hul aankoms van die ramp verneem en alternatiewe verblyf reël of terugkeer na hulle huise. Ons vra om verskoning  vir die ongerief,” het hy bygevoeg.

Die soektog na die vermiste bejaardes duur voort.

Die Limpopo-polisie was nie onmiddellik vir kommentaar beskikbaar nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

16 Kommentare

jongste oudste gewildste
riaana

My sussie en haar man was ook die naweek in geboek by klein kariba hulle wou donderdag deur gery het maar ek het toe vir hulle gese hulle moet Vrydag ry toe hulle daar kom toe kon hulle nie in gaan nie as gevolg van die oorspoelings Baie sterkte aan die twee bejaardes wat vermis is se familie Ons liewe vader sal julle deur die moeilike tyd drae

rina Hartzer

Dit is baie hartseer.

Freda

Dis vreeslik om hiervan te lees en fotos te sien! Sterkte Klein Kariba

kobie

hierdie fotos is erg. my kinders was ook daar vas gekeer. Kon eers saterdag aand inderhaas padgee.
Die trauma wat die mense daar deur moes gaan sal lank nog in gedagtes wees. Die fotos wat hul geneem het is afgryslik.Dankie Vader dat U hulle veilig gehou het. Sterkte aan die personeel van die oord wat daar moes bly,sterkte ook aan almal wat deur die trauma is.

J P Brenkman

Ons het ook een jaar in Januarie daar gekamp en visse in die straat voor die woonstelle net bokant die karavaan kamp opgetel na so n vloed,,maar hierdie moes baie erger gewees het as ek na die fotos kyk….en die karavane so opgefrommel sien….dit gaan weer gebeur en die Oord sal met die herstel van die oord aandag moet gee aan hoe die uitwerking van so n vloed n kleiner impak sal he in die toekoms. Ons voel bitter jammer vir julle almal en kan net dink aan die finansieele implikasie vir die oord as daar nie fasiliteite is om… Lees meer »