Foto’s: Vrystaat se verskroeide aarde

‘n Skilpad wat van die vlamme ontkom het. (Foto: Johan Barkenhuizen)

WAARSKUWING: Die berig bevat inhoud wat sommige lesers kan ontstel.

Mense het hul harte oopgemaak vir boere in die Vrystaat wat die afgelope paar dae steier onder talle veldbrande.

ʼn Brand wat Donderdagaand tussen Boshof en Kimberley in die Noord-Kaap opgevlam het, is in die vroeë oggendure in bedwang gebring.

Meer as 100 000 ha is in die afgelope paar dae verwoes, verskeie mense is ernstig beseer en tientalle strukture het in die slag gebly.

Johan Barkenhuizen, ʼn Wes-Kapenaar wat spesiaal na die gebied gereis het om hulp aan te bied, het gesê die brande woed oor ʼn uiters groot gebied.

“Dit is onwerklik,” het Barkenhuizen die duisende hektaar verskroeide aarde beskryf.

Hy en sy seun is deel van die vrywilligers wat help om brande te blus of selfs net water aan te ry.

“Hier is baie voer wat reeds afgelewer word. Hulp kom van oral, selfs van plekke soos Calvinia wat self sukkel weens die droogte. Mense maak hulle harte oop.”

In een geval het ʼn barmhartige samaritaan ʼn vrag lemoene en nartjies gestuur wat as voer vir beeste gebruik kan word.

Op video’s kan duidelik gesien word hoe wyd die skade weens die brande is.

Sommige van die boere in die streek het hulle hele kuddes verloor. Duisende hektaar weiding het afgebrand, pype na damme het weggebrand wat beteken damme het drooggeloop en water moet nou aangery word, lyndrade is verwoes en erg verbrande diere moet van kant gemaak en begrawe word.

“Die manne trek swaar …” het Barkenhuizen gesê.

Andrea Campher, ramprisikobestuurder van Agri SA, sê die brande het ook na dele van die Noord-Kaap en Noordwes versprei.

“Die plaaslike boereverenigings is besig om skadebepalings te doen en die omvang van die skade te bepaal,” het sy gesê.

Volgens Campher word die organisasie oorval deur oproepe van mense wat enigiets van vervoer tot geld en voer wil skenk. Sy sê talle van hul lede het hul ook gekontak om te vra vir hulp.

“Die prentjie van die brande het mense se hartsnare geraak,” het sy gesê.

Trevor Abrahams, besturende direkteur van die organisasie Working on Fire (WoF), het Donderdagaand gesê verskeie verenigings bied onder meer lugsteun om die brande te bestry, terwyl tientalle brandbestryders op die grond help om die situasie in bedwang te hou.

“Ons wens alle grond- en lugbrandbestryders net die beste toe en vra lede van die publiek om veilig, waaksaam en versigtig te wees. Ons gedagtes is saam met julle almal,” het Abrahams gesê.

Vir baie boere is die brande nóg ʼn bittere terugslag. ʼn Uitbreking van bek-en-klouseer, die Covid-19-pandemie en die gevolglike afsonderingstyd en nou die verwoestende brande eis hul tol op die gemoed.

Henk Maree, woordvoerder van die burgerregtegroep AfriForum, sê talle organisasies werk in hierdie stadium saam om hulp te koördineer.

“Die reaksie was onbeskryflik goed en mense maak ongelooflike bydraes. Ons wil mense aanmoedig om asseblief aan te hou skenk. Die behoefte is groot.”

Maree sê danksy die onderlinge samewerking tussen organisasies kan ʼn skenking van voer aan een organisasie byvoorbeeld blitsig danksy ʼn ander organisasie met beskikbare vragmotors, aangery word.

“Die samewerking is uitstekend,” het hy gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

24 Kommentare

jongste oudste gewildste
Zandra

ek sien manne soos Malema en Bheki is doodstil, wonder hoekom

Deon

Waar is die kerke in hierdie tragedie?

Anel

En die regering en die lot wat die oorsaak was is so stil soos die graf. Maar nou ja, ons kom nog altyd sonder hulle klaar. Sal nogsteeds. En as alles weer voorspoedig is, kom staan hulle bakhand. Hulle vermoor ons mense, brand en verwoes alles en dan verwag hulle ons moet vir hulle sorg!!! Baie stetkte aan elke boer in hierdie land.

Kokerboom

Ons lewe in gevaarlike en hartseer tye. Dit alles te danke aan die siek ideologieë van die ANC.
Dis NOU tyd dat ons saamspan en voorsorgende strategieë in plek stel. Die verwoesting is nie ydele waarskuwings en moet nie ligtelik opgeneem word!!My innige meegevoel met diegene wat so swaar getref is

Jojo

Ek haal my hoed van my kop af kruis my hande voor my bors sak op my kniee net soos manne sou doen want eks n Boer vrou en kyk maar net op na Bo. Want my Vader verstaan trane in 2020. n Jaar wat vir menige tot einde moet Kom…