Fourie dalk dronk op moordtoneel, hoor hof

Konst. MJ Mashinini het Woensdag in die rondgaande hof in Bethlehem gesê Abraham Thomas Fourie (52) was moontlik onder die invloed van drank toe die polisie hom op 13 Junie gekonfronteer het oor sy lewensmaat, Johanna Maryna Venter (48), se dood.

Hy het ook ontken dat hy enigiets weet van bloed wat volgens Mashinini duidelik voor die polisie se koms afgewas is.

Fourie word aangekla van Venter se moord en word tans verhoor. Hy het Woensdag weer in die hof verskyn, waar hy heeltyd kop onderstebo in die beskuldigdebank gesit en skryf het. Hy het skaars na Mashinini gekyk terwyl sy getuig het.

Volgens Mashinini het Fourie op 13 Junie aan die polisie gesê dat hy Venter daardie oggend dood in die slaapkamer op die grond aangetref het. Haar kop was glo vooroor gebuig. Fourie het Maandag in die hof getuig Venter het ʼn bottel brandewyn in die hand gehad.

Die polisie is die oggend deur Fourie se vriend, Barry Stander, na die toneel ontbied, wat aan die polisie gesê het dat Venter haar eie lewe geneem het.

“Op die toneel het die beskuldigde nie duidelik aan ons gesê of Venter dood is nie, net dat sy baie drink en moontlik geval het,” sê Mashinini.

Volgens Mashinini het Fourie normaal gepraat en geloop, maar hy het na alkohol geruik. “Hy kon moontlik onder die invloed van alkohol wees, ek kan dit nie bevestig nie.”

Fourie het ook vroeër in die hof aangedui dat hy Venter probeer bybring het. Volgens Mashinini het hy dit egter nie aan die polisie genoem nie.

Sy het verder getuig dat Fourie aan die polisie gesê het hy het die vorige aand in sy vragmotor geslaap en is onkundig oor wat in die huis gebeur het. Volgens hom het hy die huis die volgende oggend in ʼn chaotiese toestand aangetref.

Mashinini het in die hof gesê die slaapkamer was deurmekaar en vuil en dit het vir haar gelyk asof daar ʼn fisieke skermutseling in die kamer kon plaasgevind het. Sy sê dit lyk ook asof die kamer lanklaas skoongemaak is.

“Die wasgoedmandjies was gebreek en vuil klere het orals op die grond gelê. Daar was ook hare – duidelik dié van ʼn mens – wat op die slaapkamervloer gelê het. Die hare het tot by die badkamerdeur gelê.”

Venter se liggaam was reeds styf en koud met polisie se aankoms, het die hof gehoor.

‘Moontlik onder die invloed’

Volgens Mashinini was daar ook bloed op die vloer langs die bed en op die muur, asook op die deurraam van die slaapkamer. Daar was ook bloed op die vloer en muur van die badkamer en bloed in die stort.

Sy sê dit het gelyk asof die bloed afgewas is, maar die persoon het nie ʼn ordentlike werk gedoen nie omdat die bloed nog duidelik sigbaar was. “Die strepe van hoe die persoon die bloed probeer afwas het, was duidelik sigbaar.”

Die polisie het luminol op die vloere en mure gespuit wat aangedui het dat daar wel bloed was.

Mashinini sê wat ook opmerklik was, was die groot plastiekskottel – van ongeveer 60 cm in omtrek – wat in die stort gestaan het.

Sy sê die polisie het Fourie oor die bloed op die vloer ondervra, en hy het gesê dat daar nie bloed op die vloer was toe hy by die huis gekom het nie. “Hy het vir ons gesê die vloer was nat en hy het ʼn mop gebruik om die vloer skoon te maak. Hy het gesê hy weet niks van bloed nie.

“Toe ons Fourie oor die bebloede klere gevra het, het hy gesê Venter het die klere ʼn week voor haar dood aangehad toe sy ‘oor die vragmotor se sleepwa’ geval het. Hy sê dit is moontlik waar die bloed vandaan kom.

“Ek dink egter as dit ʼn week gelede was, sou die bloed droër gewees het.”