Fratsongeluk eis Tukkie ná sus se troue

Annien Müller (22) het Sondag in ’n fratsongeluk gesterf. Dié foto is Saterdag by haar tweelingsussie, Carolien Scheepers, se troue geneem. (Foto: Verskaf)

ʼn 22-jarige mediese student van die Universiteit van Pretoria (UP) het Sondag in ʼn fratsongeluk gesterf toe sy haar kêrel te hulp gesnel het nadat sy motor gerol het. Dit was ʼn dag ná haar tweelingsussie se troue in Potchefstroom.

Annien Müller (22) en haar kêrel van die afgelope ses jaar, Reino von Wielligh (29), het Sondag in afsonderlike voertuie na Pretoria teruggery toe Von Wielligh se motor gerol het. Die ongeluk het omstreeks 16:45 op die N14 net verby Diepsloot naby Lanseria plaasgevind.

Riandi van Rensburg (28), Müller se ouer sussie, het aan Maroela Media verduidelik dat die pad nat en baie glad was. Daar was reeds ʼn ander ongeluk toe Von Wielligh ook beheer oor sy motor verloor het. Müller het gevolglik stilgehou om haar kêrel te help.

“Hy het vir Annien gesê en gewys hy is oukei, maar toe klim Annien uit haar kar om hom te help.

“Nóg ʼn kar het toe gegly en haar getref. Dieselfde kar het daarna ook Reino se kar getref en dit het omgedop. Dit was regtig ’n fratsongeluk en die bestuurder het geen beheer daaroor gehad nie.”

Die paartjie se hond, Xara, het ná die ongeluk weggehardloop. Sy is steeds soek.

Die paartjie se hond, Xara, ’n swart pointer, was in Von Wielligh se motor en het ná die ongeluk weggehardloop. Sy is steeds soek.

Müller is met ʼn helikopter na die Netcare Sunninghill-hospitaal in Johannesburg geneem, maar het later dieselfde aand aan haar beserings beswyk.

“Hulle het alles probeer om haar te stabiliseer, maar haar brein is in die ongeluk beskadig en toe het haar hart gaan staan.

“Dit is ’n baie hartseer tyd,” het Van Rensburg gesê.

Müller se tweelingsussie, Carolien Scheepers, het Saterdag in Potchefstroom getrou. Sy was reeds op haar wittebrood naby Vryburg in Noordwes toe die tragedie Sondag plaasgevind het.

Müller is ’n oudleerder van Potchefstroom Gimnasium, waar sy in 2017 een van die skool se onderhoofdogters was. Sy het in akademie sowel as sport uitgeblink.

Sy laat onder andere haar kêrel, ouers, Rina en Joggie, twee susters en broer, Christoff Müller (23), agter.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

17 Kommentare

jongste oudste gewildste
RB

So bitter hartseer, so baie wat ons nooit sal verstaan.
Mag daar uiteindelik troos wees in elke mooi herinnering aan haar.

Swerwer

Innige simpatie en meegevoel met die ouers, familie en nasbestaandes van Annien.

AW

Werklik Hartseer.

Mense, wat uit hulle voertuie klim en op n Botsings rond staan vir watter rede ook al,

Het te veel in my lewe al gesien , hoe mense beseer is en of gedood is, as gevolg van “Secondary Colissions “.

En wanneer jy vir die mens sê / vra , om hulle self te verwyder , dan is jy die vark in die fee verhaal.

Madeleine

Soo hartseer

Skappie

Sterkte aan haar kerel, en haar gesin in hierdie moeilike tyd. Mag onse liewe Heer julle almal styf in Sy arms vashou.