Argieffoto
Vier vingers van ’n werker se hand het Vrydagoggend in die slag gebly weens ’n fratsongeluk met masjinerie by ’n fabriek in Pietermaritzburg in KwaZulu-Natal.
Shawn Herbst, woordvoerder van Netcare 911, sê in ’n verklaring paramedici is omstreeks 09:18 na ’n fabriek in Mkondeni ontbied.
’n Werker se hand het in ’n slypmasjien beland en dié masjinerie moes in geheel eers afgeskakel en gestabiliseer word voordat die man behandel kon word.
Volgens Herbst het die masjien vier van die man se vingers geamputeer en hy moes ontsettende pyn verduur. Hy is dadelik pynmedikasie toegedien voordat die masjien deur brand-en-reddingsdienswerkers uitmekaar gehaal is om sy hand te bevry.
Die fabriekswerker is daarna na ’n hospitaal geneem vir verdere mediese behandeling.
