Friedrich Stark se afsterwe: ‘Ons gaan hom verskriklik mis’

Elsjé en Friedrich Stark het in 2012 in afwagting van Binnelanders se 1 500ste episode, by Coenie de Villiers gekuier op Kwêla

Elsjé en Friedrich Stark het in 2012 in afwagting van Binnelanders se 1 500ste episode, by Coenie de Villiers gekuier op Kwêla

Elsjé Stark, vrou van Friedrich Stark, een van die Binnelanders-vervaardigers wat op Kersdag oorlede is, het gesê die gesin gaan hom verskriklik mis.

“Dit is heeltemal voortydig,” het Elsjé bewoë aan Maroela Media gesê. Friedrich was 62 jaar oud. Sy het gesê hul drie seuns, onderskeidelik 34, 33 en 29 jaar oud, is ook baie geskok oor sy skielike heengaan.

Volgens Elsjé was Friedrich saam met sy sussie by hul woonstel in Kaapstad toe hy in sy slaap oorlede is, vermoedelik aan ʼn hartaanval of beroerte.

Ernst Swart, woordvoerder vir Binnelanders, is tans in Thailand. Hy het aan Maroela Media gesê Friedrich se afsterwe is ʼn baie groot verlies. “Friedrich Stark se sterwe laat ʼn leemte wat nie gevul sal kan word nie,” het hy gesê.

Stark was ’n prominente figuur in die televisiebedryf. Hy is bekend as regisseur en vervaardiger van veral Generations en Binnelanders. As jong akteur was hy te sien in onder meer Die Voortrekkers (1973), Môre, Môre (1973), Dingetjie is Dynamite (1975), Kiepie en Kandas (1981) en in die gewilde televisiereeks Net ’n bietjie Liefde (1977).

“Friedrich was sjarmant, gaaf, snaaks, vrygewig en baie slim,” het Mitzi Booysen, hoofskrywer en mede-vervaardiger van Binnelanders, gesê. “Wanneer dit nodig was, het hy my vir myself laat lag en ’n mens was altyd ten volle bewus van sy waardering en ondersteuning. Ek is seker dat almal wat deel is van die uitgebreide Stark-familie ook in skok is oor die nuus van sy ontydige afsterwe. Ek weet dat ek hom baie gaan mis, nie net as kollega nie, maar ook as vriend. RIP, Friedrich.”

Karen Meiring, M-Net: direkteur kykNET-kanale, het bygevoeg sy het “ongelooflike respek vir Friedrich as mens, vervaardiger en baanbreker in die televisiebedryf” gehad. “Hy was altyd hartlik en baie vrygewig met sy kennis en ervaring. Dit was ’n voorreg om hom as deel van die kykNET-kanale te kon beskou,” het sy gesê.

Maroela Media het vroeër berig kykNET en Binnelanders het Kersdag afskeid geneem van Stark en ʼn storielynskrywer, Elsabé Roux.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

9 Kommentare

Marinda ·

Saam julle hartseer, was n groot “fan” van hom…my innige simpatie! RIV Friedrich!

Bokkie ·

Ek en my man het gister n ou storie gekyk van 6 Soldate wat in Angola afgespeel het.En n vreeslike jong Friedrich Stark het daarin gespeel.Ons is baie verbaas om te hoor oor sy heengaan.Ons innige simpatie met sy gesin en familie.Die ou spelers het so goed gespeel dit maak mens hartseer om te lees dat so baie van hulle al oorlede is.

Bokkie ·

Friedrich Stark het in 6 Soldate ook gespeel.Hartseer oor al die ou spelers wat nie meer lewe nie.Innige simpatie aan die Stark familie

Hennie ·

Hy het ook as kind gespeel in “Trompie en die Boksembende”.

Leendert ·

Ek is baie geskok om te hoor van Friedrich se dood. Hy was nog so jonk. My innige simpatie aan sy naasbestaandes.

Charmaine ·

Waaraan is Elsabe Roux, die ander lid vd Binneland-span oorlede? Baie treagies

SARIE VAN HEERDEN ·

Baie gragies om te hoor van Friedich se afsterwe. Was sy ouma nie ook jare gelede of saam met hom, of op haar eie, betrokke by televisieopnames nie? So ‘n bekkige ou tannietjie met kortgekrulde hare.

Zach Zamaria ·

Jy is heeltemal reg, dit was sy ouma.
Sy het die rol van Tant Annie (saam met oom Thysie) gespeel, en haar naam was Francis Coertzen.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.