Gautrein ʼn ‘wit olifant’ – AA

(Argieffoto: Gautrein)

Die Automobiel-Assosiasie (AA) het Donderdag die provinsiale regering se plan om nóg roetes tot die Gautrein-netwerk te voeg, verwerp, aangesien dié treindiens oënskynlik ʼn wit olifant is.

Die AA het in ʼn voorlegging aan die Gautengse provinsiale regering gesê die huidige vraag na die spoorstelsel is relatief laag en dat die lewensvatbaarheid van nog roetes nie binne redelike risikoparameters vasgestel kan word nie.

“Die Gautrein vervoer doodeenvoudig nie soveel passasiers soos aanvanklik voorspel is nie. Om nou waardevolle finansiële hulpbronne te bestee op ʼn vervoerstelsel wat ʼn mislukking is, ten koste van een wat beter en meer bekostigbaar is, maak nie sin nie,” het die AA in ʼn verklaring gesê.

“Ons is ten gunste van alternatiewe vervoermiddels wat besoedeling en opeenhopings verminder, maar die Gautrein is nie die oplossing nie.”

Volgens die AA plaas die Gautrein bykomende druk op die provinsie se vervoerbegroting aangesien dit nie so gereeld gebruik word soos destyds voorspel is nie.

“Die sogenaamde beskermingswaarborg wat die Gautengse regering onderteken het, verseker dat Bombela – die sakeonderneming wat die Gautrein bedryf – vergoed word indien hulle nie die minimum totale inkomste genereer nie. Indien hulle nie hierdie doelwit bereik nie, kan hulle op die provinsiale regering staatmaak om die verskil te betaal.”

Dié ooreenkoms het belastingbetalers sedert 2012 sowat R12 miljard gekos, juis omdat daar nie genoeg mense is wat gebruik maak van die Gautrein se dienste nie. Die waarborg veroorsaak ook dat ander vervoeropsies wat deur die groter bevolking gebruik word, nie behoorlik befonds word nie.

Luidens die AA se voorlegging moet die provinsiale regering eerder in die oprigting van ʼn provinsiale busstelsel belê en veilige fietspaaie voorsien. Dié voorstelle is volgens die AA ʼn goedkoper alternatief vir die groter bevolking en kan met ander vervoermiddels geïntegreer word.

“Jare voordat die kabinet die Gautrein in 2005 goedgekeur het, het die destydse parlementêre portefeuljekomitee vir vervoer sy kommer oor die finansiële volhoubaarheid van die belegging uitgespreek. Byna twee dekades later is hierdie bekommernisse bewaarheid, maar in plaas daarvan om die ernstige vervoerkrisis in die provinsie op te los, het die Gautrein ʼn stelsel geword vir welgestelde persone wat in elk geval toegang tot ander vervoermiddels het,” het die AA gesê.

Daar is talle ander besware in die AA se voorlegging ingesluit, waaronder die ongegronde vooruitskattings van die ekonomiese voordele wat die Gautrein op gebiede om die stasies inhou, asook die gebrek aan identifiseerbare teikengebruikers vir nuwe roetes en die hoë koste daaraan verbonde om grond te onteien om die uitbreidings te bou.

“Die Gautrein is ʼn mislukte stelsel wat nie ʼn massavervoeroplossing vir die mense in die provinsie bied nie. Dit sal ʼn mislukking weens so lank as wat dit deur belastingbetalers befonds word.

“Om die Gautrein-dienste nou uit te brei, is ekonomies onaanvaarbaar en die proses moet onmiddellik gestaak word,” het die AA gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

25 Kommentare

jongste oudste gewildste
Jacques

Yep, die ding is te duur om te gebruik, want ons wil mos net skep.

Belinda

Miskien die ritte en/of parkering goedkoper maak dan sal meer mense belang stel om die wit olifant te gerbuik…

Gompie

As ek so na al die treinstasie in Pta kyk en altyd vol voertuie staan dan wonder ek wie ry dan op die trein. Seker die mense wat daar stop se geeste! Dit is ‘n miernes jy voor die Centurion een wil verby kom.

Anel

Ek het nog nooit met dit gery nie. Sou baie graag nog wou, maar kan dit net nie beskostig nie. En as ek nie kan nie, glo ek daar is duisende ander wat ook nie kan nie. So, ja, dit is ‘n wit olifant en hoopeloos te duur vir die mense vir wie dit blykbaar oorspronklik gebou is. Beplaning en marknavorsing het hier agtet gebly. Net my opinie.

JohanR

Dis omtrent die enigste trein spoor in 27 jaar, wat nog min of meer werk! Kry al die ANC minister, hulle families en vriende ook vry vervoer op die Gautrein?