Gebaretaal help dowe om graad te vang

Ilze Aäron (Foto: Verskaf)

Ilze Aäron (24), ’n dowe student aan die Universiteit Stellenbosch (US) wat vandeesweek haar BEd-graad (grondslagfase) ontvang het, is die eerste US-student wat met behulp van Suid-Afrikaanse Gebaretaal (SAGT) studeer het.

Luidens ʼn verklaring uitgereik deur die US sal Aäron van die Paarl, Wes-Kaap, haar graad vandeesweek by die Desember 2021-gradeplegtigheid ontvang. Sy het vergunning gehad om die vier jaar lange graadkursus in vyf jaar te voltooi.

Die universiteit se Eenheid vir Gestremdhede en Taalsentrum het tolkdienste in gebaretaal aan Aäron beskikbaar gestel. Twee gebaretaaltolke, Marsanne Neethling en Gert Erasmus, het elke klas saam met haar bygewoon en haar met alles wat sy nodig het, gehelp.

Aäron vertel sy sou heel voor in die klas sit – wat soms deur soveel as 200 studente bygewoon is. Die tolk sou voor haar sit en waarneem wat die dosent in die lesing aanbied.

“Dit is nie maklik om twee mense – die dosent en die tolk – gelyktydig dop te hou nie. Selfs al kon ek ’n klein bietjie hoor en gedeeltelik volg van wat die dosent sê, moes ek ook die tolk se gebare dophou. Ons het dan ná die klas seker gemaak dat ek al die werk verstaan en dat ek nie iets gemis het nie,” vertel Aäron.

Soms het die Taalsentrum ’n kamera verskaf om die tolk op te neem sodat sy die opname ná die klas kon kyk. “Ek sou dan vrae voorberei wat ek die volgende dag, met behulp van die tolk, aan die dosent kon stel.

“Omdat dit ’n langdradige en moeilike proses was, het ons besluit om eerder gebruik te maak van iemand wat aantekeninge neem. As daar nie so ʼn persoon beskikbaar was nie, sou een tolk aantekeninge maak terwyl die ander een vir my tolk, aangesien ek as ’n dowe student nie gelyktydig die tolk kon dophou én aantekeninge maak nie. Ander kere het ek ’n afspraak met die dosent gemaak om die werk met behulp van die tolk te bespreek.”

Aäron sê die tolke was van die begin af saam met haar in die klas om seker te maak sy voel ingesluit en dat sy toegang tot die lesings en leermateriaal het. “Dit was beslis ’n groot aanpassing vir my om van ’n dowe omgewing te beweeg na ’n wêreld waar almal kan hoor.”

Sy het ʼn passie vir onderwys en wil nou graag klasgee vir dowe leerders.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

6 Kommentare

jongste oudste gewildste
Swerwer

IIze baie geluk! Dit is onbeskryflik! Weereens ‘n bewys van waar daar ‘n wil is, is daar ‘n weg. ‘n Ongelooflike voorbeeld vir ander.

Francois Le Cochon

Wel gedaan aan Ilze en die tolke!!! Moeite doen werp altyd vrugte af.

Skappie

Baie geluk aan jou Ilze.

Marius

Voorwaar ‘n uitmuntende prestasie en bewys dat enige hindernis oorkom kan word as jy wil. Gelukkig het US nog nie die SAGT laat verbied op kampus nie…

Frikkie

Vir my wat stadigaan my gehoor verloor is hierdie weereens n teken dat ek ( en amal wat goeie gehoor het ) baie dankbaar moet wees vir wat ons nog het. You Go, Girl, jy kan, jy het en jy gaan bo uitkom! sterkte!