‘Gee staatsgrond dadelik aan swart boere’

Mmusi Maimane, leier van die DA (Foto: ANA)

Mmusi Maimane, leier van die Demokratiese Alliansie, het Saterdag gesê enige afskaffing van privaat eiendomsregte sal Suid-Afrika se ekonomie ondermyn en tot groter armoede en werkloosheid lei.

Maimane het tydens ʼn perskonferensie in Johannesburg, ná die party se federale uitvoerende komitee vergader het, die regering gemaan om dadelik die meer as 4 300 staatsbeheerde plase en meer as 1.9 miljoen hektaar van staatsgrond, wat nie gebruik word nie, aan opkomende swart boere te gee.

Die DA ondersteun grondhervorming en het ʼn trotse rekord dat hy voldoen aan dié grondwetlike noodsaaklikheid waar hy aan bewind is, het Maimane gesê. “Geen ander regering in Suid-Afrika het al meer gedoen om stedelike eiendomshervorming toe te pas as DA-geleide regerings nie. Ons het meer as 75 000 ontvangers van staatsgesubsidieerde behuising vir die eerste keer ware huiseienaars laat word.”

Die DA se posisie is duidelik, het Maimane bygevoeg – die proses van grondhervorming moet bespoedig word, maar dit moet binne die huidige grondwetlike raamwerk plaasvind. Die DA se federale uitvoerende raad het sy algehele en onwrikbare teenstand tot die voorstel, om die Grondwet só te verander dat onteiening sonder vergoeding kan plaasvind, opnuut benadruk, asook enige ander voorstel om grond te nasionaliseer.

“Ons ondersteun nie die ANC se model van permanente huurpag en steun op die staat nie. Ons staan individuele eiendomseienaarskap voor. Ons wil hê mense moet ʼn ware aandeel hê in die ekonomie en om die kans te hê om bates op te bou. Ons soek absolute en die wettig afdwingbare sekuriteit van verblyfreg vir inwoners van gemeenskaplike grond, en waar hierdie grond nie in trust gehou word nie, ʼn veilige titelakte.

“Hierdie roekelose voorstelle is gesamentlik deur die ANC en die EFF gemaak, en word nou aanvaar as die amptelike beleid van die ANC – wat in ʼn parlementêre mosie aanvaar is. Hulle het dit gedoen sonder enige besonderhede of ʼn plan, en dit lei tot geregverdigde angs oor die toekoms.

“Die afskaffing van privaat eiendomsregte sal ons land se ekonomie ondermyn en sal tot groter armoede en werkloosheid lei, net soos die geval is in enige ander konteks wêreldwyd waar dié malle beleid gepoog is,” het Maimane bygevoeg.

Hy het gesê die DA het ʼn plig om Suid-Afrikaners in te lig oor wat presies op die spel is, en om hulle te mobiliseer om dié mosie en sy roekelose voorstellers te oorwin. “Die DA sal nie van dié plig wegskram nie. Alle eiendomseienaars, en diegene wat eendag graag eiendom wil besit, moet die DA ondersteun.

“Ons benadruk weer ons versoek dat die meer as 4 300 staatsbeheerde plase, en meer as 1,9 miljoen hektaar van staatsgrond wat nie gebruik word nie, dadelik aan opkomende swart boere versprei moet word.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

41 Kommentare

jongste oudste gewildste
Eish

Hul moet dit maar gebruik as verkiesings foefie deur aan die massas te toon dat indien hul kaart en transport van hul eiendom het, dit finansiële voordeel inhou. Hul kan die verkoop, verhuur en as sekuriteit aanbied. Hul gaan dit nodig hê om getalle te trek want ek dink tradisionele blanke kiesers gaan in hordes vertrek van die bloubloed party.

knersus

Is dit waar dat parlementslede sowat 400 van hierdie staatsbeheerde plase vir hulle gevat het? Dit sal my glad nie verbaas nie.

Paul

Put, put, stotter, put-put-put, sukkel my poegie aan ….

Gerrit

DA is net ‘n klomp opportunististe. As hul nie so swak opposie was nie, sou ANC meer op hul hoede gewees het.

jaco

watter staatsgrond? omtrent die helfte van die grond rondom die Theewaterskloofdam is staatsgrond. meestal berge, maar ook lekker stukke bewerkbare grond. daar kan egter niks mee gedoen word nie. dit MOET net so bly want dit dien as ‘n tipe “spons” wat reenwater en afloopwater vanaf die berge opvang en dan loop dit na die dam toe. die Theewaterskloofdam is klaar amper leeg. Gee daardie staatsgrond weg vir “our people” en dit sal NOOIT weer water in hê nie, selfs al is die droogte ook verby.
besef Maimane dit???