Geen brandweerwaens in Thabazimbi beskikbaar

Argieffoto (Foto: Michael Schwarzenberger/Pixabay)

Die Demokratiese Alliansie in Limpopo sal vrae aan die minister van samewerkende regering en tradisionele sake, Nkosazana Dlamini-Zuma, rig om te bepaal watter planne in plek gestel word om die tekort aan brandbestrydingsvoertuie in die Thabazimbi- plaaslike munisipaliteit te takel en wanneer onklaar brandweerwaens herstel sal word.

Thane Hearne, speaker van die munisipaliteit, het gesê Thabazimbi-rampbestuur is tans in besit van ʼn Nissan-bakkie, ʼn Toyota-bakkie, ʼn Iveco, ʼn Tata-vragmotor en ʼn MAN-brandweerwa.

Die instandhouding van dié voertuie is die verantwoordelikheid van die Waterberg-distriksmunisipaliteit.

“Die MAN-vragmotor het geen pomp nie en kan dus nie gebruik word om brande mee te blus nie,” het Hearne bygevoeg. “Die gebrek aan instandhouding van die voertuie is ʼn voortgesette kommer vir die DA, want dit is duidelik dat die Waterberg-munisipaliteit geen planne het om die situasie te takel nie.”

ʼn Tweede MAN-vragmotor staan glo al twee jaar by die Brake and Clutch-sentrum in Thabazimbi, maar is nog steeds nie herstel nie. “Die afwesigheid van ʼn enkele operasionele brandweerwa bedreig die lewens van ons inwoners. ʼn Toename in beurtkrag en kouer aande beteken ook ʼn groter risiko in veral digbevolkte informele nedersettings.”

Thabazimbi het boer- en mynbougemeenskappe wat oor groot afstande strek in Thabazimbi, Northam, Dwaalboom, Leeupoort, Rooiberg en Kromdraai. “Indien ʼn brand sou uitbreek, sal dié gemeenskappe kwesbaar wees.”

Hearne het gesê die DA doen ʼn beroep op die distriksmunisipaliteit om die herstel van die bestaande brandweerwaens te prioritiseer en seker te maak dat daar voldoende brandbestrydingstoerusting beskikbaar is.

“As ʼn DA-koalisieregering in Thabazimbi werk ons onverpoosd om ʼn veilige omgewing te verseker deur druk te plaas op die Waterberg-distrik om brandbestrydingsvoertuie te verskaf sodat daar behoorlik op brande reageer kan word.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

11 Kommentare

jongste oudste gewildste
Miskruier

Ek wonder hoeveel meer dorpe het die probleem. Die polisie se voertuie word nie eens herstel nie.

Sarel

Gedn Brandweerdienste of water bedkikbaarte Vanderbijlpark.
Telkom Tekefoonlyne afgesit weens wanbetaling en Randwater het druk vermindet weens wanbetaling

marius

Die hele land is ‘n volslae mislukking

MakersMark

Useless munisipaliteite.

Elize

Ek sien soveel potentiaal. Lei motorwerktuigkundiges op. Daar is duidelik ‘n GROOT tekort.