‘Geen meer Steve,’ sê MultiChoice

(Argief) Steve Hofmeyr ontvang ‘n Ghoema-toekenning (Foto: YJR Photography)

MultiChoice het bekend gemaak dat hy nie meer enige inhoud sal uitsaai waarin die sanger Steve Hofmeyr verskyn nie. Dit sluit enige argiefmateriaal van die sanger in.

Die maatskappy, van wie DStv ʼn filiaal is, het aan Channel24 gesê dat hy nie enige verdere blootstelling aan die kunstenaar gaan gee deur lugtyd of enige geleentheid waardeur die kunstenaar ʼn inkomste kan verdien nie.

Maroela Media het vroeër berig MultiChoice het versoek dat die musiekvideo van “Die Land” van die benoemingslys van kykNET se Ghoema-musiektoekennings verwyder word as gevolg van Steve Hofmeyr se betrokkenheid daarby. Die lied word deur Hofmeyr, Bok van Blerk, Bobby van Jaarsveld, Jay en Ruhan du Toit gesing.

MultiChoice het gedreig om sy borgskap van dié geleentheid te beëindig indien dit nie gebeur nie. Die organiseerders van die Ghoema-musiektoekennings, die Ghoema Musiek Trust, is versoek om die “Die Land”, wat vir beste musiekvideo benoem is, van die benoemingslys af te haal.

Talle sangers het daarna vir Hofmeyr in die bres getree en van die sangers het aangedui dat hulle nie die Ghoema-toekenningsgeleentheid sal bywoon nie.

“MultiChoice ondersteun met trots Afrikaans deur ons belegging in inhoud vir ons DStv-platforms [waaronder kykNET] en ons borgskappe vir feeste, geleenthede en die breër Afrikaanse uitvoerende kunste-bedryf,” het die maatskappy in daardie stadium aan Channel24 gesê. “Ons toewyding tot Afrikaans en ander Suid-Afrikaanse tale sal nie verander nie.”

Channel24 het intussen MultiChoice genader om te hoor of die maatskappy hom distansieer as ʼn uitsaaimaatskappy van ʼn nuwe musiekvideo waarin Hofmeyr verskyn. “Die maatskappy het dit duidelik gestel dat dit nie net die nuwe musiekvideo is nie, maar enige inhoud waarin Steve Hofmeyr verskyn.”

Dirk Hermann, bestuurshoof van Solidariteit, het in reaksie aan Maroela Media gesê MultiChoice is “soos ʼn groot boelie op die speelgrond wie besluit watter maatjie mag waar speel”. “MultiChoice besluit watter sondes verhoor moet word, kla aan, wees regter en verban, bloot omdat hul kan. Aangesien MultiChoice nie meer ʼn platform is nie, maar sedebewaker, wonder mens of Bill Cosby se inhoud ook verbied gaan word? Hulle voel sekerlik ook sterk teen die molestering van vroue.” Maroela Media het vroeër berig Cosby is skuldig bevind en gevonnis op drie aanklagte van seksuele aanranding nadat hy Andrea Constand in 2004 bedwelm en gemolesteer het.

“Dit is ʼn byenes as ʼn mediaplatform sedebewaker wil wees, behalwe as hul doelbewus selektief is met sondes wat verban moet word,” het Hermann bygevoeg.

Maroela Media het MultiChoice genader en wag vir terugvoer. -Red

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

158 Kommentare

jongste oudste gewildste
AmY

Geen meer Multichoice vir my.

Bernard Hellberg

“Geen meer Steve” – Multichoice
“Geen meer Multichoice ” – Steve?

Jean

Ek dink DSTV is kinderagtig en ek dink hulle moet ook n les geleer word soos SPUR en die res. Steve praat net die waarheid

Vintcent

Multichoice is die ANC se handpoppe. As hul aardsrassiste soos Malema en Noah verdra, is dit mos duidelik hoe die wind waai.

HPV

Ag siestog, kyk hoe skrik ons nou vir multiwatsenaam se kinderagtige gekerm.